Ադրբեջանական APA լրատվական գործակալության փոխանցմամբ՝ Ադրբեջանի Հանրապետության պետական նավթային ընկերության (SOCAR) նախագահ Ռովնագ Աբդուլաևը Ստամբուլում տեղի ունեցած 3-րդ Սևծովյան տնտեսական ու էներգետիկ ֆորումում առաջ է քաշել նոր երթուղի, որով ադրբեջանական գազը Թուրքիայի տարածքով հայտնվելու է Եվրոպայում.
«Դա Անդրանատոլիական խողովակաշարն է։ «Բաքու-Թբիլիսի-Ջեյհան» (ԲԹՋ) նավթամուղի ու «Բաքու-Թբիլիսի-Էրզրում» (ԲԹԷ, Հարավկովկասյան) գազատարի կառուցմամբ Թուրքիայի ու Ադրբեջանի դերն ուժեղացավ տարածաշրջանում։ Երկու երկրների էներգամիությունը հանդիսանում է կարևոր քայլ՝ «Հարավային գազային միջանցքի» նախագծի իրագործման ճանապարհին։
«Անդրանատոլիական» խողովակաշարը մեծ նշանակություն է ունենալու Եվրոպայի էներգաանվտանգության հարցում։ Այն ունենալու է տարեկան 16 միլիարդ խորանարդ մետր թողունակություն և ձգվելու է Թուրքիայի արևելյան սահմանից դեպի արևմտյան սահման։
«Անդրանատոլիական» գազատարի նախագծի կառուցումը չի նշանակի ևս մեկ էներգետիկ նախագծի՝ Nabucco-ի ավարտ։ Շուտով «Շահ Դենիզ» կոնսորցիումը որոշում կկայացնի, թե որ էներգետիկ նախագծին (Nabucco, TAP (Անդրադրիատիկ), «Սպիտակ հոսք» (Վրաստան, Ուկրաինա), ITGI (Թուրքիա-Հունաստան-Իտալիա) ) է նախապատվություն տալու»։
Հիշեցնենք, որ ադրբեջանական «Շահ Դենիզ» գազային հանվաքայրի մշակման երկրորդ փուլը մեկնարկելու է 2017 թվականին, արդյունահանվելու է տարեկան 16 միլիարդ խորանարդ մետր գազ, որից 6 միլիարդը վաճառվելու է Թուրքիային, իսկ 10 միլիարդը՝ Թուրքիայի տարածքով տարանցվելու է դեպի Եվրոպա։
