Լոնդոնի Սիթի շրջանի վարչությունը ցուցարարներին վերջին հնարավորությունն է տվել Սուրբ Պողոսի տաճարի դիմաց հիմնած ճամբարը հանելու համար` վրանների վրա փակցնելով հեռանալու մասին ծանուցումը:
Ինչպես հայտնում է BBC-ն, «Գրավե՛ք Լոնդոնը» շարժման ակտիվիստները հոկտեմբերի 15-ին փորձել են «օկուպացնել» Լոնդոնի ֆինանսական ֆոնդային բորսան, սակայն ոստիկանությունը թույլ չի տվել նրանց ներխուժել տարածք: Դրանից հետո ցուցարարները վրաններ են տեղադրել բորսայի դիմաց գտնվող Սուրբ Պողոսի տաճարի հրապարակում:
Վրանային ճամբարը դժվարացրել է տաճարի այցելուների, դպրոցականների և զբոսաշրջիկների երթևեկը: Մեկ շաբաթվա ընթացքում շենքը փակվել էր, սակայն որոշ ժամանակ անց այն կրկին սկսել է գործել:
Դատարանի որոշմամբ, վրանների մի մասը հանվել էր: Սակայն իշխանությունները հետագայում հրաժարվել էին բռնության կիրառումից` ակտիվիստներին գործարք առաջարկելով՝ ցուցարարներին թույլ կտան մնալ մինչև Նոր տարի, այնուհետև կսահմանեն վերջնական ժամկետը:
Բանակցութունները, սակայն, տապալվեցին, և Սիթիի իշխանությունները խոստացան դատարան դիմել` պահանջելով ճամբարները հանել տարածքից: Ակտիվիստներն, իրենց հերթին, հայտարարեցին, որ չեն պատրաստվում հեռանալ: Շատերը նույնիսկ բացահայտ պատռեցին ծանուցումը:
Սիթիի իշխանությունները հայտարարել են, որ եթե մինչև երեկո հրապարակը ազատված չի լինի, նրանք այլևս չեն զգուշացնելու և ցուցարարներին միանգամից ուղարկելու են դատարան:
