ՀՀ ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին տեղեկացնում են, որ այսօր` նոյեմբերի 17-ին, ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը հանդիպել է Մեծ Բրիտանիայի ԱԳՆ Հարավային Կովկասի հարցերով պատասխանատու Ժոզեֆին Գոլդի հետ:
Ն. Զոհրաբյանը ներկայացրել է Հայաստանի եվրոպական ինտեգրման գործընթացը:
Կողմերը զրուցել են այն խնդիրների շուրջ, որոնք այսօր խոչընդոտում են Հայաստանի եվրաինտեգրման արդյունավետ իրականացմանը: Ն. Զոհրաբյանն անդրադարձել է նաև տնտեսական ու քաղաքական խնդիրների, ապա հյուրերի խնդրանքով ներկայացրել առաջիկա խորհրդարանական ընտրություններին վերաբերող մի քանի խնդիրներ:
Անդրադարձ է կատարվել նաև լրամշակված Ընտրական օրենսգրքին:
Հանձնաժողովի նախագահը կրկին կարևորել է միջազգային դիտորդական առաքելությունների ակտիվ և անաչառ ներկայությունն առաջիկա խորհրդարանական և նախագահական ընտրություններում:
Ն. Զոհրաբյանը, անդրադառնալով Հայաստան-Մեծ Բրիտանիա քաղաքական հարաբերություններին, նշել է, որ ցավոք, այդ հարաբերություններում լրջագույն գործոն է British petrolium-ը և նշել՝ ինքը հասկանում է, որ Ադրբեջանի արտաքին ներդրումների 50 տոկոսը պատկանում է Մեծ Բրիտանիային, սակայն հույս է հայտնել, որ Մեծ Բրիտանիայի քաղաքականությունը տարածաշրջանում կլինի հավասարակշռված:
Այնուհետև նա ներկայացրել է միջազգային կազմակերպություններում Հայաստանի և Մեծ Բրիտանիայի խորհրդարանական պատվիրակությունների հարաբերությունները` նշելով, որ ցավոք, այդ համագործակցությունը արդյունավետ չէ և հյուրին տրամադրել է «Գարդիան» պարբերականում վերջերս տպագրված և մեծ աղմուկ հանած հոդվածը, թե ինչպես է Մեծ Բրիտանիայի խորհրդարանի պատգամավոր Մարկ Ֆիլդը մեծ գումարների դիմաց հստակ լոբբիստական գործունեություն իրականացրել Ադրբեջանի օգտին։
Ն. Զոհրաբյանը նշել է, որ ցավոք սրտի, դա եզակի դեպք չէ և մատնանշել է ԵԽԽՎ-ում առկա նման դեպքերը` մասնավորապես նշելով Մեծ Բրիտանիայի պատվիրակության անդամ Մայք Հենքոքին։
Ն. Զոհրաբյանի խոսքով` ինքն ամենայն պատասխանատվությամբ կարող է հայտարարել, որ այդ պատգամավորն ուղղակիորեն ֆինանսավորվում է Ադրբեջանի կողմից և Ադրբեջանի բացահայտ քարոզչությունն է տանում Եվրոպայի խորհրդում:
Տիկին Զոհրաբյանը հույս է հայտնել, որ Մեծ Բրիտանիայի խորհրդարանի ղեկավարությունն ու քաղաքական ուժերը այսուհետ շատ ավելի հետևողական կլինեն նման դեպքերը բացահայտելու և դրանց կրկնությունը թույլ չտալու համար:
Կողմերն անդրադարձել են նաև տարածաշրջանային խնդիրների:
