«Խոսքի ազատություն» կոմիտեի նախագահ Աշոտ Մելիքյանը և «Հրապարակ» օրաթերթի գլխավոր խմբագիր Արմինե Օհանյանը լրագրողների հետ հանդիպմանը ներկայացրին իրենց տեսակետը` կապված ՍԴ վերջին որոշման հետ:
Խոսքը քաղաքացիական օրենսգրքի 1087.1 հոդվածի մասին է, որի` Սահմանադրությանը համապատասխանության փաստը ՄԻՊ Կարեն Անդրեասյանի դիմումի համաձայն վիճարկվում էր դատարանում:
Հիշեցնենք, որ նշյալ հոդվածի լայնիմաստ և ոչ որոշակի ձևակերպումը առիթ և մահակ է ԶԼՄ-ների դեմ. նրանց հրապարակած գրեթե ցանկացած խոսք որակվում է որպես զրպարտություն և վիրավորանք, որի դիմաց հսկայական փոխհատուցումներ են պահանջում:
Աշոտ Մելիքյանը նշեց, որ հոդվածը դժվար էր հակասահմանադրական ճանաչելը, և ՍԴ-ն արեց հնարավորը:
Բանախոսը նշեց, որ դա կարող է դատավորներին ուղերձ լինել:
Արմինե Օհանյանը ՍԴ որոշումը համարեց կիսահղի, որը բացասական ազդեցություն կունենա ԶԼՄ-ների գործունեության վրա: Ըստ նրա` ՍԴ-ն այդ որոշմամբ փակեց բազմաթիվ թակարդներ պարունակող հոդվածը բարեփոխելու ճանապարհը:
Այդուհանդերձ, ըստ Ա. Օհանյանի, ՍԴ-ն տվել է հոդվածի վերաբերյալ որոշ մեկնաբանություններ, որոնցից լրատվամիջոցները կարող են օգտվել:
Ըստ այդ մեկնաբանությունների` ապացուցված բեռի մի մասը կրում է հայցվորը: Պետք է ապացուցվի, որ զանգվածային լրատվամիջոցը այս կամ այն անձի մասին հրապարակելիս ունեցել է դիտավորություն:
ՍԴ-ն նաև առանձնացրել է վիրավորանք և զրպարտություն ասվածը և որպես ուղեցույց նշել, որ եթե, օրինակ, ԶԼՄ-ն հերքում է տպագրել, այդ դեպքում նրան չպետք է կրկնակի պատասխանատվության ենթարկել:
