Ոստիկանությունը հայտնաբերել է խոշոր թունել, որը կապում է ամերիկյան Կալիֆոռնիա նահանգը Մեքսիկայի Ներքին Կալիֆոռնիա նահանգի հետ: Ինչպես հաղորդում է France-Presse-ը, թունելում գտնվել է առնվազն 15 տոննա մարիխուանա: Նշվում է, որ մարիխուանայի փաթեթների մեծ մասի վրա փակցված է եղել «Captain America» լոգոտիպը:
ԱՄՆ իմիգրացիոն և մաքսային ոստիկանության տվյալներով` 370 մետրանոց թունելը կապում է ամերիկյան Սան Դիեգո քաղաքի շրջակայքում գտնվող պահեստը Մեքսիկայի Տիխուանա քաղաքի պահեստի հետ:
Թունելը հայտնաբերվել է այն բանից հետո, երբ Սան Դիեգոյում ոստիկանությունը կալանավորել է կասկածելի բեռնատար, որում հայտնաբերվել է 3 տոննա մարիխուանա: Թունելի ամերիկյան հատվածում ոստիկանությունը գտել է առնվազն 6 տոննա թմրանյութ, իսկ մեքսիկական մասում՝ ավելի քան 7 տոննա:
Թունելում հայտնաբերվել են հովացման և լուսավորման սարքավորումներ: Ոստիկանությունից հայտնել են, որ, դատելով ամեն ինչից, թունելի շինարարությունն ավարտվել է բոլորովին վերջերս: Ամենայն հավանականությամբ, այն եղել է մեքսիկացի «Սինալոա» նարկոկարտելի հսկողությանտակ:
Սա ԱՄՆ ոստիկանության կողմից մեկ տարվա ընթացքւմ հայտնաբերված արդեն երրորդ թունելն է, որն օգտագործվում է ԱՄՆ թմրանյութեր տեղափոխելու համար: