Գործարար Սիլվա Համբարձումյանը պահանջում է և հետամուտ է լինելու, որ Սյունիքի մարզպետ Սուրեն Խաչատրյանն իրենից հրապարակային ներողություն խնդրի: Այս մասին նա ասաց «Առաջին լրատվական»-ի հետ զրույցում:
«Իր մարզպետ լինելն ինձ ընդհանրապես չի հետաքրքրել: Ինքը՝ որպես տղամարդ, ինձնից՝ հայ գործարար կնոջիցս, պետք է մասսայական ներողություն խնդրի և իմ հարցերը լուծի: Եթե ներողություն չխնդրի, հետամուտ եմ լինելու մինչև վերջ: Եթե ինքը՝ որպես տղամարդ գոնե մի քիչ կա, պետք է ներողություն խնդրի: Միաժամանակ, դեռ քրեական գործ է հարուցված, դատարան դիմել չեմ կարող, գործը դատարան կուղարկի դատախազությունը: Ինքն ինձ չի հետաքրքրել, ինքը մարզպետ է-մարզպետ չէ՝ ինձ ընդհանրապես չի հետաքրքրում, իր հետ ո՛չ գործ ունեմ, ո՛չ էլ կունենամ»,- ասաց Սիլվա Համբարձումյանը:
Հարցին՝ հետամուտ լինելո՞ւ է, որ Սուրեն Խաչատրյանը, բացի հրապարակային ներողություն խնդրելը, իրեն նաև դրամական փոխհատուցում վճարի, կին գործարարը նկատեց. «Թքել եմ իր դրամական փոխհատուցման վրա: Ինքը փող ունի, թող իր պարտքերը փակի: Իր էդ պարտքը չփակելու բանով ընկել է այս վիճակի մեջ»,- ասաց նա:
Հիշեցնենք, որ Հայաստանի հատուկ քննչական ծառայությունում հարուցվել է քրեական գործ՝ քաղաքացի Սիլվա Համբարձումյանից ստացած գրավոր հաղորդման հիման վրա՝ ըստ որի Սյունիքի մարզպետ Սուրեն Խաչատրյանը, նոյեմբերի 14-ին, «Արմենիա-Մարիոթ» հյուրանոցում հարվածներ է հասցրել իրեն:
Սիլվա Համբարձումյանին առաջարկվել է դատաբժշկի ուղեգիր, սակայն նա հրաժարվել է փորձաքննության ենթարկվել՝ պատճառաբանելով, որ մարզպետի հարվածից ցավ է զգացել, սակայն մարմնական վնասվածքներ չի ստացել:
Հարուցվել է քրեական գործ` ՀՀ քրեական օրենսգրքի 118-րդ հոդվածի հատկանիշներով, կատարվում է նախաքննություն:
Ս. Համբարձումյանը ՀՀ հատուկ քննչական ծառայություն էր հրավիրվել դեռևս նոյեմբերի 10-ի՝ մամուլի հրապարակումների հիման վրա նախապատրաստվող նյութերի շրջանակներում:
Հիշեցնենք, որ նոյեմբերի 10-ին մամուլում տպագրվել է Ս. Համբարձումյանի հայտարարությունն այն մասին, որ իրեն պատկանող «Լիճվազք-Թեյի» ոսկու հանքից Սյունիքի մարզպետ Սուրեն Խաչատրյանը գողացել է 102 միլիոն դրամ արժողությամբ սարքավորում:
