Քիչ առաջ Շենգավիթ վարչական շրջանի ընդհանուր իրավասության դատարանում ավարտվեց ՀՀ ԶՈՒ պայմանագրային զինծառայող, լեյտենանտ Արտակ Նազարյանի սպանության գործով առաջին նիստը:
Տեղեկացնենք, որ նախորդ նիստերն ընթացել են Տավուշի մարզի Բերդ քաղաքում: Վերջին նիստի ընթացքում դատավորը որոշում էր կայացրել գործը թողնել Տավուշի ընդդատության ներքո, սակայն արտագնա նիստեր անցկացնել Երևանում:
Դատավոր՝ Տավուշի մարզի ընդհանուր իրավասության դատարանի նախագահ Սամվել Մարդանյանը քննության է առնում կողմերի ներկայացրած միջնորդությունները:
Ինչպես «Առաջին լրատվական»-ին հայտնեց Արտակ Նազարյանի քույր Ծովինար Նազարյանը, դատական նիստի ժամանակ մեղադրվող ԱՏՀԱ գծով տեղակալ, կապիտան Հակոբ Մանուկյանի պաշտպանը միջնորդություն ներկայացրեց, որ գործը վերադարձվի մեղադրողին` պատճառաբանելով, որ քրեական գործի նյութերը և իր պաշտպանյալի նկատմամբ հարուցված մեղադրանքը չեն համապատասխանում: «Ընդմիջումից հետո մյուս կողմերը միացան այն պնդմանը, որ քննությունը կոծկվել է և պատշաճ քննություն չի կատարվել ու պետք է նոր քննություն սկսել: Մենք ասացինք, որ պետք է նոր քննություն սկսել, ոչ թե վերադարձնել մեղադրողին»,- մանրամասնեց Ծովինար Նազարյանը`հավելելով, որ միայն մեղադրող դատախազը առարկեց՝ ասելով, որ եթե ցանկանում են պարզաբանել գործի մանրամասները և հարցեր ունեն, ապա հարցեր ունի նաև դատարանը: Նաև ասաց, որ բոլոր հարցերը կարող են պարզաբանվել հենց դատարանում:
Ե՛վ տուժող, և՛ պատասխանող կողմը գտնում է, որ գործը կեղծված է և լուրջ դատաքննություն անելն անիմաստ է: «Միջնորդություն ներկայացրեցինք՝ բացարկ դատախազին, որը դատավորը մերժեց, հետո եղավ ինքնաբացարկ դատավորին, դատավորը մերժեց, որից հետո պետք է հաստատվեր դատաքննության կարգը, հերթականությունը, բոլոր կողմերը, բացի մեղադրող դատախազից, ասացին, որպեսզի վկաները ու ամբաստանյալները ցուցմունք տան»,- տեղեկացրեց Ծ. Նազարյանը`հավելելով, որ գործում եղած գրավոր ապացույցները դատավորը որոշեց հետազոտել վերջում, որն առաջարկել էր մեղադրող կողմը: Այս ամենից հետո դատավորը վերադարձել էր խորհրդակցական սենյակ: Հաջորդ դատական նիստը տեղի կունենա հաջորդ երեքշաբթի օրը, ժամը 11:00-ին:
Հիշեցնենք, որ Արտակ Նազարյանը մահացել է 2010 թ. հուլիսի 27-ին, ծառայության վայրում` Տավուշի մարզի Բերդի տարածաշրջանի Չինարի գյուղից ոչ հեռու տեղակայված «Մեհրաբներ» զորամասի հսկողությանը հանձնված մարտական հենակետերից մեկում, որի ավագն էր: ՀՀ ՊՆ Քննչական ծառայության կատարած նախաքննությունն ավարտվել է և գործը դատարան է մտել՝ որպես ինքնասպանության դրդում: Մինչդեռ Նազարյանները պնդում են, որ նախաքննությունը կատարվել է հանացավոր թերություններով` ընդհուպ մինչև ապացույցների ոչնչացում և կեղծում:
Քրեական գործող մեղադրվում են Արտակ նազարյանի հինգ ծառայակիցներ` նրա գումարտակի ԱՏՀԱ գծով տեղակալ, կապիտան Հակոբ Մանուկյանը, հարևան «Լույս» հենակետի ավագ, լեյտենանտ Վահագն Հայրապետյանը և դասակի երեք շարքայիններ` Մխիթար Մխիթարյանը, Ադիբեկ Հովհաննիսյանը և Հարութիկ Կիրակոսյանը: Վերջինիս նկատմամբ կալանքի միջոցը փոխվել է, և նա հանձնված է զորամասի հսկողությանը, որտեղ շարունակում է ծառայությունը: Մեղադրանքը պաշտպանում է զինվորական դատախազ Հարություն Հարությունյանը:
Տուժողի իրավահաջորդ Հասմիկ Հովհաննիսյանի ներկայացուցիչներն են փաստաբաններ Մուշեղ Շուշանյանը, Սեդա Սաֆարյանը և իրավապաշտպան Ռուբեն Մարտիրոսյանը:
