Իտալիայի արդեն նախկին վարչապետ Սիլվիո Բեռլուսկոնին հեռախոսային զրույց է ունեցել ԱՄՆ նախագահ Բարաք Օբամայի, Ռուսաստանի նախագահ Դմիտրի Մեդվեդևի և վարչապետ Վլադիմիր Պուտինի, ինչպես նաև մի շարք այլ համաշխարհային առաջնորդների հետ` նրանց շնորհակալություն հայտնելով համագործակցության համար: Այս մասին հաղորդում են իտալական ԶԼՄ-ները:
Այսպես, La Repubblica թերթը գրում է, որ երեքշաբթի երեկոյան Բեռլուսկոնին զանգահարել է ԱՄՆ նախագահ Բարաք Օբամային, ավելի վաղ նա խոսել է Ռուսաստանի նախագահ Դմիտրի Մեդվեդևի և վարչապետ Վլադիմիր Պուտինի հետ:
Բեռլուսկոնիի մամուլի գրասենյակից հայտնել են, որ նա Մեդվեդևին նամակ է ուղարկել, որում շնորհակալություն է հայտնել Ռուսաստանի նախագահին «երկկողմանի հարաբերությունների զարգացմանն ուղղված հիանալի աշխատանքի, ինչպես նաև միջազգային խնդիրների լուծման համար»:
Բացի այդ, Բեռլուսկոնին խոսել է Ֆրանսիայի նախագահ Նիկոլա Սարկոզիի, Գերմանիայի կանցլեր Անգելա Մերկելի և Մեծ Բրիտանիայի վարչապետ Դևիդ Քեմերոնի, Իսրայելի վարչապետ Բենյամին Նեթանյահուի և Թուրքիայի վարչապետ Ռեջեփ Թայիփ Էրդողանի, ԱՄՆ նախկին նախագահ Ջորջ Բուշ կրտսերի հետ: