Ձյան գալուն պես` մեր քաղաքում տեղաշարժը ավելի է բարդանում, և սա արդեն ավանդական խնդիր է դարձել:
Հայաստանի սպառողների ասոցիացիայի նախագահ Արմեն Պողոսյանն այսօր ասուլիսում նշեց, որ Երևանի բոլոր քաղաքապետները մեծ քանակությամբ տրանսպորտային միջոցներ ներկրելու խոստումներ են տալիս, բայց այդպես էլ վիճակը չի փոխվում:
«Էլեկտրատրանսպորտը տեղաշարժի ամենահարմար միջոցն է: Մենք կորցնում ենք տրոլեյբուսը, որը 3-4%-ից չի գերազանցում: Միկրոավտոբուսները կալանել են մեզ, և մենք ստիպված ենք օգտվել դրանցից»:
Ա. Պողոսյանի խոսքով` որոշ չափով նվազել է միկրոավտոբուսների քանակը. ըստ ծրագրի`ընդհանուր տրանսպորտում դրանց տեսակարար կշիռը պետք է լինի 19.2%, սակայն այդ ցուցանիշին դեռ շատ երկար ժամանակ չենք հասնի:
Ըստ բանախոսի` թեև տարածաշրջանում մեր հաղթաթուղթը էլեկտրաէներգիայի ավելցուկ ունենալն է, սակայն այն չի ծառայում սեփական կարիքների համար:
«Բավականին մեծ հույսեր ենք կապում նոր քաղաքապետի հետ, ով այս ոլորտում աշխատելու բազմամյա փորձ ունի: Այսօր գրավոր դիմելու ենք, որպեսզի մի քանի, հատկապես տրանսպորտային և քաղաքաշինական, խնդիրների մասին բարձրաձայնենք: Պետք է նոր միկրոավտոբուսների ներկրման մորատորիում հայտարարել»,- ասաց Ա. Պողոսյանը:
Նրա հաշվարկներով` հասարակական տրանսպորտի ոլորտում օրական 75 հազարից ավելի դոլար հասույթ է ստացվում, որի մոտ կեսը ստվերում է, և ամենաշատ թաքնված ստվերը այս ոլորտում է:
«Երևանում ամեն օր երթևեկում է 600 հազար մարդ, ստեղծվում է մի բլիթ, որը պետք է բաժանվի ուժեղների միջև: Ոչ մի այլ բիզնես նման շատ ու նման արագ շահույթ չի ապահովում:
Բայց շատ մոտ ապագայում մեզ կոլապս է սպառնում»:
