«Գնաճի տեմպին նայելիս հականում ես, որ նախորդ տարիներին գնաճը բարձր է եղել, բայց այսքան ցավագին չի ընդունվել»,- այս մասին այսօր Ազգային ժողովում հայտարարեց ՀՅԴ պատգամավոր Արա Նռանյանը՝ որպես ապացույց բերելով 2004-2006 թթ. ներգաղթը:
Նա նշեց, որ ներկայումս կառավարությունը վարում է ցածր եկամտի քաղաքականություն, քաղաքացիները թողնում, գնում են. «Կառավարության կողմից վարվող ցածր եկամտի քաղաքականությունը բերում է արտագաղթի»:
Ա. Նռանյանի խոսքով՝ կյանքը դժվարացել է, հասարակությունը չի տեսնում կառավարության ցանկությունը՝ թեթևացնել քաղաքացու բեռը:
Ըստ Ա. Նռանյանի՝ թվում էր, թե գոնե նախընտրական տարում կառավարությունը պետք է գնար այդ քայլին, ցույց տար, որ կբարձրացնի աշխատավարձերը:
ՀՅԴ պատգամավորը հայտարարեց, որ վարվում է միտումնավոր քաղաքականություն՝ միտված արտագաղթը խրախուսելուն, իսկ արտագաղթի արդյունքում փոքրանում է տնտեսությունը:
«Հարկավոր է կայացնել քաղաքական որոշում, ու այդ դեպքում և՛ փող է գտնվում, և՛ հնարավորություն»,- հայտարարեց Ա. Նռանյանը:
