ՀՀ պաշտպանության նախարարության տեղեկատվության և հասարակայնության հետ կապերի վարչությունից «Առաջին լրատվական»-ին տեղեկացնում են, որ նոյեմբերի 15-ին ՀՀ ՊՆ վարչական համալիրում տեղի է ունեցել զինված ուժերի գործունեությունը կարգավորող իրավական ակտերի վերանայման և առաջարկությունների մշակման համար ստեղծված աշխատանքային խմբի անդրանիկ նիստը:
Նիստը վարել է ՀՀ պաշտպանության նախարար Սեյրան Օհանյանը:
Աշխատանքային խմբի ստեղծման նպատակը պաշտպանության ոլորտի օրենսդրական բարեփոխումներն արդյունավետ իրականացնելու համար շահագրգիռ, կարող ուժերի համախմբումն է:
Աշխատանքային խմբի գործունեությունը համակարգում է ՀՀ պաշտպանության նախարարի տեղակալ Արա Նազարյանը:
Աշխատանքային խմբի անդրանիկ նիստի ընթացքում Ս. Օհանյանը և ՀՀ զինդատախազ Գ. Կոստանյանը ընդգծել են, որ խմբի գործունեությունն ուղղված կլինի զինված ուժերի գործունեությունը կարգավորող կամ ոլորտին առնչվող այլ իրավական ակտերի վերանայմանը, իրավական ակտերում փոփոխություններ կամ լրացումներ կատարելու վերաբերյալ առաջարկությունների մշակմանը, ինչպես նաև զինված ուժերում հանցավորության մակարդակի բարձրացմանը նպաստող գործոնների հայտնաբերման ուղղությամբ ուսումնասիրությունների իրականացմանը և դրանց վերացման կամ ազդեցության նվազեցման վերաբերյալ առաջարկությունների ներկայացմանը:
Բացի ՀՀ ՊՆ իրավասու ներկայացուցիչներից` աշխատանքներին ներգրավվելու են նաև ՀՀ զինդատախազության, Մարդու իրավունքների պաշտպանի գրասենյակի և քաղաքացիական հասարակության շահագրգիռ ներկայացուցիչներ:
Աշխատանքային խմբի նիստին մասնակցել են նաև ՀՀ պաշտպանության նախարարի հրամանով ստեղծված իրավախախտումների կանխարգելման, օրինականության և կարգապահության ամրապնդման հարցերով զբաղվող մշտական հանձնաժողովի անդամները:
Ա. Նազարյանի նախագահությամբ գործող հանձնաժողովը, որում ներգրավված են պատասխանատու համապատասխան ստորաբաժանումների ներկայացուցիչներ, քննարկելու է ՀՀ ԶՈՒ զորամասերում տեղի ունեցած դեպքերն ու արտակարգ պատահարները, ինչպես նաև կոռուպցիոն ռիսկերի նվազեցման ուղիները:
Քննարկումների արդյունքում ի հայտ եկած թերություններն ու բացթողումները վերացնելու նպատակով մշակվելու են գործուն առաջարկներ և ծրագրեր:
