«Ժողովուրդ» օրաթերթից «Առաջին լրատվական»-ին տեղեկացնում են, որ Երևանի Կենտրոն և Նորք-Մարաշ համայնքների ընդհանուր իրավասության դատարանում, դատավոր Ռուբեն Ափինյանի նախագահությամբ, այսօր լսվել է Հայաստանում ֆիզիկական առողջության պաշտպանման կենտրոնի տնօրեն, ՊՆ խորհրդական Բենիկ Հարությունյանի հայցն ընդդեմ «Ժողովուրդ» օրաթերթի:
Նախնական դատական նիստը կարճ է տևել:
Պատճառն այն էր, որ հայցվոր կողմը, ի դեմս Բենիկ Հարությունյանը, չի ստացել հայցադիմումի պատասխանը, քանի որ նա հայցում նշված հասցեում (Հրազդան քաղաք) չի բնակվում:
Հայցադիմումը հետ է եկել` գրությամբ, որ Հարությունյանը բնակվում է Երևանում:
Այս պատճառով դատավոր Ափինյանը որոշել է հետաձգել «Ժողովուրդ»-ի դեմ ներկայացված հայցով դատական նիստը` տեղափոխելով այն նոյեմբերի 29-ին, ժամը 10.00-ին:
«Ժողովուրդ»-ն իր սեպտեմբերի 9-ի համարում (N151) հրապարակել էր հոդված «Դոկտոր, պրոֆեսորի արկածները ոսկու հանքերում» վերտառությամբ, որտեղ ներկայացրել էր ԱՄՆ քաղաքացի Նունե Սերոբյանի և նրա գործընկեր Արմեն Ասրյանի խոսքերը, որոնք պատմել են, թե ինչպես է Հարությունյանն իրենցից վերցրել 294 հազար ԱՄՆ դոլար ու չի վերադարձնում:
Թեև հրապարակման մեջ ներկայացված է նաև Բենիկ Հարությունյանի և նրա փաստաբանի խոսքը, այնուամենայնիվ, ՊՆ խորհրդականը դիմել է դատարան՝ օրաթերթից պահանջելով 2.2 միլիոն դրամ:
