Օքսֆորդի քաղաքային տաքսիներում տեղադրվելու են ձայնագրման գործառույթով տեսախցիկներ, որպեսզի բողոքների դեպքում հետևեն վարորդի և ուղևորի խոսակցությանը: Իշխանությունները վստահեցնում են, որ դա արվում է անվտանգության միջոցների ուժեղացման համար:
Ինչպես հայտնում է Associated Press գործակալությունը, 2012 թվականին այդպիսի սարքավորումներ մտադիր են տեղադրել 600 ավտոմեքենայում: Դրանք գործի մեջ են դրվում այն պահից, երբ շարժիչն է միացվում և անջատվում է շարժիչի անջատվելուց 30 րոպե անց: Սակայն ավելի մեծ մեքենաներում հնարավոր է՝ տեղադրվի ևս մեկը: Ձայնագրությունը պահպանվելու է 28 օր:
Բրիտանական Big Brother Watch իրավապաշտպան կազմակերպության ներկայացուցիչ Նիկ Փիկլզը կարծում է, որ նորամուծությունը խախտում է քաղաքացիների ազատությունը` ներխուժելով նրանց անձնական կյանք: Նա խոստացել է բողոք ներկայացնել անկախ կազմակերպություն: Տեղեկատվության բրիտանական հանձնակատարը (Information Commissioner’s Office), որը զբաղվում է անձնական տեղեկատվության պաշտպանության հարցերով, հայտարարել է, որ խոսակցությունների ձայնագրման երևույթը չի ընդունվի հանրության կողմից:
Օքսֆորդի քաղաքային խորհուրդը մերժել է անձնական կյանքի իրավունքի խախատման մեղադրանքը: Պաշտոնյաների խոսքերով, հետաքննություն անցկացնելու դեպքում ձայնագրությունները հասանելի կլինեն միայն ոստիկանության և իշխանության այլ ներկայացուցիչների համար: Քաղաքային խորհրդի ներկայացուցիչը, որը հրաժարվել է իր անունը նշել, պարզաբանել է, որ նրանք ստիպված են ներխուժել անձնական կյանք անվտանգության համար:
