ԲՀԿ-ական պատգամավոր Էռնեստ Սողոմոնյանն այսօր Ազգային ժողովում շահութահարկի բազայի իջեցման խնդիրները քննարկելիս հարց ուղղեց ԲՀԿ-ական պատգամավոր, Աժ տնտեսական հարցերի մշտական հանձնաժողովի անդամ Վարդան Բոստանջյանին, թե Մերձբալթիկայում, Սկանդինավյան երկրներում, Գերմանիայում կաթնարդյունաբերությունը շատ լավ հիմքերի վրա է դրված և մթերքում «համ ու հոտ կա»:
«Որ գովազդ չանեմ, ասենք «Գավառկաթնամթերք» ընկերությունը հիմնարկի վերջին կոպեկը դնում է, հրավիրում է օտարերկրյա մասնագետներ, որ կարգավորեն իրենց չստացված աշխատանքը: Հիմա այս նախագծով ի՞նչն ենք սահմանափակում, ու կարող է խփո՞ւմ ենք բիզնեսին»- հարցրեց Է. Սողոմոնյանը:
Վ.Բոստանջյանը պատասխանեց. «Ձեր կողմից հարցը շատ սուր դրվեց, «Գավառկաթնամթերք» չի կարա լինի, առավել ևս չի կարա Սկանդինավյան երկրից մարդ հրավիրի, փող տա: Զավեշտական ա դառնում, էլի: Բոլոր դեպքերում, եթե ուզենա նրանց միջոցով ցիվիլ շրջանառություն կազմակերպել, ոչինչ, մեր երկրին պետք չի առայժմ էդ: Իհարկե, ես էլ Ձեզ հետ միասին կատակ եմ անում»: Վ. Բոստանջյանի խոսքով, բոլոր պարագաներում մեր տնտեսվարող սուբյեկտները կառավարման անվան տակ բազմաթիվ մեծ ծավալի գումարներ թաքցնում են, իբր թե ծախս են իրականացրել:
«Սա վերաբերում է տնտեսվարող սուբյեկտներին, ես չեմ շուռ գալիս ասեմ՝ պետությունն էլ նույն ձևի է: Բոլոր մեծ չինովնիկները եվրոռեմոնտների մեջ են նստում: Սրա մեջ պետք է գրեիր՝ կառավարման ծախսերի համար եվրոռեմոնտ մի արա, տաբուրետկի վրա նստի: Քյասիբ երկիր ես»,- նկատեց Վ. Բոստանջյանը ու շարունակեց. «Այս ինստիտուտը կիրառում ենք մասնավոր սուբյեկտների վրա ու ճիշտ ենք անում ու լավ ենք անում: Շատ լավ կլիներ, որ կարողանայինք մենք էս բանը նաև կիրառեինք պետական կառույցների վրա: Կառավարման համար ուղղված փողերը պետք է սահմանափակել, որպեսզի շահութահարկի բազան չփոքրանա»:
Է. Սողոմոնյանը, գնահատելով Բոստանջյանի հումորը, հայտարարեց, թե նրա պատասխանում քյավառեցու ստատուսը հաղթեց պրոֆեսորին. «Դուք այս հարցին ավելի շուտ որպես քյավառեցի պատասխանեցիք, քան թե որպես պրոֆեսոր»:
