ԱՄՆ նախագահ Բարաք Օբաման կոչ է արել Չինաստանին դադարեցնել ամերիկյան մտավոր սեփականության գողությունը և բարձրացնել սեփական արժույթը:
«Այնպիսի տնտեսության համար, ինչպիսին ԱՄՆ-ինն է, որտեղ մեր գլխավոր շուկայական առավելությունը մեր գիտելիքն է, մեր նորարարությունները, հեղինակային իրավունքները, մեզ համար անընդունելի է չստանալ մեզ համար անհրաժեշտ պաշտպանության (մտավոր սեփականության.- 1in.am) մակարդակ այնպիսի խոշորագույն շուկաներում, ինչպիսին չինականն է»,- ասել է Սպիտակ տան առաջնորդը` ելույթ ունենալով Ասիական-խաղաղօվկիանոսյան տնտեսական համագործակցության գագաթնաժողովին:
ԱՄՆ հատուկ ծառայությունները նոյեմբերի սկզբին զեկույց էին հրապարակել, որում հայտարարում էին, որ Չինաստանի հատուկ ծառայությունների կիբերհարձակումները հանգեցրել են ինֆորմացիայի մեծածավալ արտահոսքի ԱՄՆ կարևոր տնտեսական և գիտահետազոտական կենտրոններից: Փաստաթղթում նշվում էր, որ Չինաստանը տնտեսական կիբերլրտեսության բնագավառում համաշխարհային առաջատար է:
Ինչպես հաղորդում է Reuters գործակալությունը, Օբաման իր ելույթում նշել է, որ, իր նախագահության առաջին տարիներից սկսած, հայտարարել է, թե Պեկինը պետք է «խաղա օրենքներով» նաև արտարժույթի փոխարժեքին վերաբերող հարցերում:
Մի շարք ամերիկացի քաղաքական գործիչներ և տնտեսագետներ կարծում են, որ չինական յուանի բարձր փոխարժեքը Պեկինին մեծ առավելություններ է ընձեռնում առևտրի մեջ` զգալիորեն էժանացնելով չինական արտահանվող ապրանքները: Չինաստանի իշխանությունները բազմիցս հայտարարել են, որ ՉԺՀ-ի և ԱՄՆ-ի միջև առևտրական անհավասարակշռությունը կապված է ոչ միայն յուանի փոխարժեքի, այլև այն հանգամանքի հետ, որ երկու երկրներն ունեն առևտրի և ներդրումների տարբեր համակարգ, պահանջարկի տարբեր մակարդակ:
