Բուլղարական Focus գործակալությանը տված հարցազրույցի ժամանակ Euronest-ի Խորհրդարանական ասամբլեայի համանախագահ, Եվրախորհրդարանի պատգամավոր Քրիստիան Վիգենինն անդրադարձել է ԵՄ արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնի՝ հարավկովկասյան մեկնարկող շրջագայությանը.
«Էշթոնի հարավկովկասյան այցը վկայում է, որ ԵՄ-ը ցանկանում է ավելի ակտիվ լինել տվյալ տարածաշրջանում այսպես կոչված՝ սառեցված հակամարտությունների, այդ թվում՝ նաև Ղարաբաղյան հակամարտության կարգավորման համար։ Ղարաբաղյան հակամարտության կարգավորված չլինելը տարիներ ի վեր լարված մթնոլորտ է առաջացնում։ Այդ ընթացքում աննշան առաջընթաց է գրանցվել։ Ինձ թվում է, որ ԵՄ-ի ավելի ակտիվ ջանքերը կփոխեն իրավիճակը»։
Հիշեցնենք, որ Վիգենինը նախորդ շաբաթ այցելել էր Հայաստան։ Էշթոնը իր տարածաշրջանային այցի շրջանակներում նոյեմբերի 15-ին այցելելու է Ադրբեջան, նոյեմբերի 16-ին՝ Վրաստան, իսկ նոյեմբերի 17-ին՝ Հայաստան։
