Թուրքիան ձախողել է արտաքին քաղաքականության` «զրո խնդիր հարևանների հետ» գաղափարը` դրանով իսկ դառնալով ավելի խոցելի: Այս մասին այսօր կայացած մամլո ասուլիսում հայտարարեց թուրքագետ Անդրանիկ Իսպիրյանը՝ խոսելով Արևմուտքի կողմից Իրանին հարվածներ հասցնելու դեպքում Թուրքիայի հնարավոր արձագանքի մասին։
«Վերջերս հայտնի դարձավ, որ ԱՄՆ-ը Թուրքիային է տրամադրել խոցելու հնարավորությամբ օժտված անօդաչու Predator 4 հետախուզական թռչող սարք։ Թեպետ Թուրքիան ԱՄՆ-ից խնդրել էր նման ընդամենը 2 սարք, սակայն արդյունքում նրան ուղարկվեց 4-ը: Ըստ հայտարարությունների` դրանք պետք է կիրառվեն քրդերի դեմ պայքարում, սակայն հայտնի է, որ այդ սարքերի կառավարումն ու տվյալների ստացումն անմիջականորեն ԱՄՆ-ի վերահսկողության տակ են։ Ավելին՝ Թուրքիայում մտավախություն կան, որ այդ սարքերը կարող են Իրանի դեմ օգտագործվել: Հատկանշական է, որ այդ սարքերը դուրս են Թուրքիայի ռադարների հսկողությունից»,- նշեց թուրքագետը:
Անդրանիկ Իսպիրյանի խոսքով՝ Արևմուտքի կողմից Իրանի դեմ ռազմական գործողությունների դեպքում Թուրքիան անուղղակի կհայտնվի հակամարտող կողմի դերում։
«Մամուլում արդեն իսկ տեղեկություններ են հայտնվել, որ Իրանն իր դեմ հարձակման դեպքում հարվածներ է հասցնելու նաև Թուրքիային։ Սակայն պարզ է, որ թուրք-իրանական ցանկացած լարվածություն ազդելու է տարածաշրջանի, այդ թվում` նաև Հայաստանի վրա»,- նկատեց թուրքագետը:
Անդրադառնալով հայ-թուրքական հարաբերությունների կարգավորման թեմային` Իսպիրյանը նշեց, որ գործընթացում որևէ առաջընթաց չկա, և Թուրքիան որևէ գործողությամբ չի փորձում ցույց տալ, որ մոտ է հարցի լուծմանը:
«Հայ-թուրքական հարաբերությունների լավացման ուղղությամբ Թուրքիան ոչ մի քայլ չի անում: Նույնիսկ Վանում տեղի ունեցած երկրաշարժից հետո այդ երկրի ԱԳ նախարար Ահմեդ Դավութօղլուն լրագրողներին ասաց, որ Հայաստանից ուղարկված մարդասիրական օգնությունը չի կարող որևէ դրական ազդեցություն կամ դերակատարություն ունենալ երկու երկրների հարաբերությունների կարգավորման վրա»,- ամփոփեց թուրքագետը:
