Ամերիկյան Wall Street Journal-ի փոխանցմամբ՝ ԱՄՆ նախագահ Բարաք Օբամայի վարչակազմը պլանավորել է Պարսից ծոցում ԱՄՆ-ի առանցքային դաշնակիցներին տրամադրել մի քանի հազար կատարելագործված հակաբունկերային ռումբեր ու այլ զինամթերք։ Այս ամենը հանդիսանում է ԱՄՆ-ի ակտիվ ջանքերի մի մասը, որն ուղղված է տարածաշրջանային կոալիցիայի ստեղծմանը՝ Իրանին հակազդելու համար։
WSJ-ի տվյալներով՝ Վաշինգտոնը պլանավորում է մինչև 4900 ճշգրիտ ավիացիոն ռումբ և այլ սպառազինություն հատկացնել ԱՄԷ-ին։ Մոտ ժամանակներս այս պլանը ներկայացվելու է ԱՄՆ Կոնգրեսին։
WSJ-ն ընդգծում է, թե առաջիկա գործարքը վկայում է այն մասին, որ Օբամայի վարչակազմը մտադիր է զսպել իրանական ազդեցությունը տարածաշրջանում Իրաքից ամերիկյան զորքերի դուրս բերումից հետո, որ պլանավորված է մինչև տարեվերջ։ Երբ դա տեղի ունենա, ապա տարածաշրջանում կմնա 40,000-անոց ամերիկյան զինվորական կոնտինգենտ։
Այդ նպատակով Օբամայի վարչակազմը ձգտում է իր կապերն ընդլայնել Պարսից ծոցի արաբական երկրների համագործակցության խորհրդի 6 անդամների հետ (Սաուդյան Արաբիա, Քուվեյթ, Բահրեյն, Քաթար, ԱՄԷ և Օման) Իրանին հակազդելու համար։
Միաժամանակ ԱՄՆ-ը փորձում է հակահրթիռային պաշտպանության համակարգ հիմնել տարածաշրջանում, որն ուղղված կլինի իրանական մանր ու միջին հեռահարության բալիստիկ հրթիռներից պաշտպանությանը։
Պարսից ծոցի տարածաշրջանում ամերիկյան զենքի վաճառքի վերջին պայմանագրերը ներառում են Սաուդյան Արաբիային 60 միլիարդ դոլարի տարբեր տիպի սպառազինության հատկացում, այդ թվում՝ նաև կատարելագործված F-15 տիպի կործանիչների տրամադրում։ Բացի այդ, Պենտագոնը ոչ վաղ անցյալում Կոնգրեսին իրազեկել է Օմանին 1.25 միլիարդ դոլար արժողությամբ զենիթային ու ավիացիոն հրթիռներ վաճառելու իր պլանի մասին։
Հիշեցնենք, որ երեկ էլ փարիզյան «Կանար Անշենե» շաբաթաթերթը՝ վկայակոչելով ֆրանսիական հետախուզական ծառայություններին, հայտնել էր, որ այս տարվա սեպտեմբերին ԱՄՆ-ը Իսրայել է փոխադրել 55 «սուպերռումբ», որոնցից յուրաքանչյուրը կշռում է 1 տոննա, և որոնք նախատեսված են ստորգետնյա բունկերներ ներթափանցելու և լավ ամրացված ստորգետնյա կառույցների ներսում հրդեհներ առաջացնելու համար։