Նոյեմբերի 16-ին Կոմիտասի անվան կամերային երաժշտության տանը կհնչեն տարիների ընթացքում իմ գրած լավագույն երգերը` լրացված նոր երգերով, որոնք երբևէ չեն ձայնագրվել ու չեն հնչել: «Առաջին լրատվական»-ի հետ զրույցում ասաց հայտնի երգչուհի Լիլիթ Պիպոյանը, որը հազվադեպ է ելույթ ունենում մենահամերգով:
Երգչուհու խոսքով` ինքը համերգին հանդես կգա իր երաժիշտների ավանդական կազմով: «Հրավիրել եմ լավագույն երաժիշտներին` լարային եռյակ, երկու կիթառահար, նրանց է միացել մեկ շրթհարմոնահար»,- նշեց նա` հավելելով, որ թեև համերգի ազդագրում նշված չէ համերգի խորագիրը, բայց համերգն ունի «ներքին խորագիր, որը կոչվում է «Աշնան երգեր»:
Հարցին`արդյո՞ք երգերն ընտրված են այդ թմատիկայով, երգչուհին պատասխանեց, որ դժվար է ասել` կոնկրետ կապ ունե՞ն, թե՞ ոչ, սակայն մթնոլորտն «աշնանային» կլինի:
Լ. Պիպոյանի խոսքով` ունկնդիրներին հրաշալի համերգ է սպասվում, քանի որ իր հետ նվագելու են լավագույնները` շրթհարմոնահար Արտակ Ներսիսյանը, Բելգիայից կժամանի կիթառահար Տիգրան Տեր-Ստեփանյանը, Վալերի Հարությունյանը, ալտահար Յանա Դարյանը, թավջութակահարուհի Աննա Հարությունյանը:
2 բաժնից բաղկացած՝ մոտ 2 ժամ տևողությամբ համերգին ընդհանուր առմամբ կհնչի 21 երգ, բայց, ինչպես խոստովանեց երգչուհին, ինքը պատրաստել է 4 երգ, որոնք, հնարավոր է, լրացուցիչ կատարվեն համերգից հետո:
Մեզ հետ զրույցում երգչուհին խոստովանեց, որ Կամերային երաժշտության տան ակադեմիական` սպիտակ լույսերով մթնոլորտը մի փոքր կձևափոխի: «Լինելու են գունավոր լույսեր, չի լինի այս չոր, սպիտակ լույսը, ուրիշ մթնոլորտ կլինի»,- հավելեց երգչուհին:
Լ. Պիպոյանի մենահամերգի տոմսերը վաճառվում են 1000-3000 դրամով:
