Անցած շաբաթ օրը՝ դեկտեմբերի 11-ին, Միացյալ Նահանգների նախագահ Բարաք Օբաման և Թուրքիայի վարչապետ Ռեջեփ Թայիփ Էրդողանը հեռախոսազրույց են ունեցել: Հեռախոսազրույցի նախաձեռնողը եղել է ԱՄՆ նախագահը, որը փորձել է իր թուրք գործընկերոջը համոզել, որ երկու երկրների միջև հարաբերությունները շարունակում են մնալ բարձր մակարդակի վրա, չնայած վերջերս WikiLeaks-ի հրապարակած արտահոսքերը զգալիորեն վնասել են դրանց:
Այս մասին Associated Press գործակալությանը հայտնել է Սպիտակ տան աղբյուրը:
Հիշեցնենք, որ WikiLeaks-ի հրապարակած փաստաթղթերի համաձայն` ամերիկյան դիվանագիտությունը կասկածում է, որ Էրդողանը շվեյցարական բանկերում ունի դրամական հաշիվներ, ինչն առաջացրել էր վարչապետ Էրդողանի դժգոհությունը: Բացի այդ, խոսվում է հարևան Իրանի հետ Թուրքիայի սերտ հարաբերությունների, նրան անօրինական վաճառվող զենքի և պայթուցիկների մասին:
Էրդողանն իր հերթին ասել է, որ այդ հրապարակումները չպետք է ազդեն երկկողմ հարաբերությունների վրա` հայտարարելով, որ ընդունում է պետքարտուղար Քլինթոնի ներողությունները WikiLeaks-ի արտահոսքի համար:
Օբաման ասել է, որ այն, ինչ հրապարակված է WikiLeaks-ի փաստաթղթերում, չի արտացոլում ԱՄՆ դիրքորոշումը Թուրքիայի հետ հարաբերությունների վերաբերյալ` շեշտելով, որ կարևորում է ԱՄՆ-ի և Թուրքիայի միջև ռազմավարական հարաբերությունների զարգացումը: