Ինչպես տեղեկացնում է Грузия Online-ը, վրացի միլիարդատեր Բիձինա Իվանիշվիլին այսօր կայացած մամլո ասուլիսում անդրադարձել է 2008թ. օգոստոսյան հնգօրյա ռուս-վրացական պատերազմին և քննադատել Վրաստանի իշխանությանը պատերազմի վերսկսման համար՝ որպես հիմք ներկայացնելով շվեյցարացի դիվանագետ Հայդի Տալյավինիի ղեկավարած ԵՄ հանձնաժողովի ներկայացրած զեկույցը:
«Բերեմ փաստեր Տալյավինիի հայտարարությունից և հատուկ բանաձևից, որտեղ ամրագրված է, որ Վրաստանն է սկսել ռազմական գործողությունները: Ես կարող եմ հստակեցնել այն վրացիների համար, ում համար դա ցավալի է, և հիշեցնել, թե ինչպես է ընթացել գործընթացը, և ինչպես էր գնդակոծվում Լիախվա գետի հովիտը` անհայտ խմբավորումների կողմից: Եվ փոխանակ Սաակաշվիլին տեղահաներ բնակչությանը և հրավիրեր միջազգային կազմակերպություններին ու ամրագրեր, թե այնտեղ ինչ է կատարվում, նա սկսեց չհիմնավորված ռմբակոծությունը տարածաշրջանում, և դա ամեն տեղ ամրագրվեց»:
Իվանիշվիլին նաև նշել է, որ Վրաստանի իշխանությունները փորձում են Վրաստանի բնակչությանը մոլորության մեջ գցել` մի քանի ԶԼՄ-ների միջոցով:
