«168 ժամ»-ի տեղեկություններով` «Օրինաց երկիր» կուսակցությունում լուրջ խուճապ է սկսվել:
«Բանն այն է, որ ՀՀ նախագահ Սերժ Սարգսյանը կոալիցիայի անդամ կուսակցությունների ղեկավարների հետ հանդիպման ժամանակ զգուշացրել է, որ նախընտրական ցուցակները կազմելիս չպետք է հայտնվեն գործարարների անուններ: Մեր աղբյուրների փոխանցմամբ` դրանից հետո Ա. Բաղդասարյանը հայտնվել է անելանելի վիճակում, քանի որ նա վաղուց Էդուարդ Մադաթյանին (Խուճուճ Էդո) և Արայիկ Հայրապետյանին (Լավանդայի Արայիկ) խոստացել էր ընդգրկել ՕԵԿ համամասնական ցուցակում, ինչի դիմաց Էդ. Մադաթյանն և Ա.Հայրապետյանը կուսակցությանը պետք է ֆինանսական աջակցություն ցուցաբերեին նախընտրական փուլում: Ըստ նույն աղբյուրների, վերջիններս արդեն իսկ որոշակի գումարներ տրամադրել են ՕԵԿ-ին` տարբեր վարչական շրջանակներում ՕԵԿ շքեղ գրասենյակներ բացելով: Ըստ այդ տեղեկությունների` նրանք Ա. Բաղդասարյանին ասել են, որ այլևս չեն պատրաստվում ֆինանսական աջակցություն ցուցաբերել ՕԵԿ-ին, ինչն Ա. Բաղդասարյանին շատ անհարմար վիճակի մեջ է դրել»,-գրում է թերթը:
