Metallica խմբի առաջին համերգը Հնդկաստանում հետաձգվել է մասսայական անկարգությունների պատճառով, որոնք կազմակերպվել են խմբի երկրպագուների կողմից: Ոստիկանությունը ձերբակալել է շոուի հնդիկ կազմակերպիչներին: Այս մասին հաղորդում է РИА Новости-ն:
Հանրահայտ խմբի համերգի հետ կապված խնդիրները սկսվել էին դեռևս հինգշաբթի օրը, երբ նրանք պետք է համերգ տային Գուրգաոնում: 25 հազար երկրպագուները, ովքեր սև շորեր հագած հավաքվել են Գուրգաոնի մարզադաշտի մոտ, դռները բացվելուն պես՝ ներս են մտել, և հենց այստեղ էլ պարզ է դարձել, թե ինչ վատ են նախապատրաստել կազմակերպիչներն այս համերգը: Բեմի սարքավորումներն անգամ վերանորոգված չեն եղել: Ամբոխը ջարդել է աթոռները և այլ անկարգությունների դիմել:
Հայտարարվել է, որ համերգը հետաձգվում է և տեղի կունենա շաբաթ օրը:
Հեռուստաընկերությունների տվյալներով՝ հանդիսատեսների պատճառած վնասը գնահատվել է 200 հազար դոլար:
Շաբաթ օրը համերգը կրկին հետաձգվել է, ինչի կապակցությամբ Metallica–ի անդամներն իրենց ափսոսանքն են հայտնել:
