Իսպանիայի կառավարությունը որոշում է կայացրել Վրաստանին արտահանձնել «օրենքով գող» Զաքարի Քալաշովին` «Շաքրո-մոլոդոյ» մականունով, որը հիմա բանտարկության մեջ է Իսպանիայում: Սակայն գործընթացը դեռ ավարտված չէ և պետք է հաստատվի Իսպանիայի դատական ազգային պալատի կողմից: Այս մասին հաղորդում է NEWSru գործակալությունը:
Ինչպես հաղորդում է կայքը` հղում անելով վրացական իշխանությունների իր աղբյուրներին, արտահանձման որոշումը կայացվել է Վրաստանի նախագահ Միխեիլ Սաակաշվիլու և Իսպանիայի վարչապետ Խոսե Լուիս Սապատերոյի հանդիպման ժամանակ: Միացյալ Արաբական Էմիրություններում 2006 թ. ձերբակալված Քալաշովն այնուհետև հանձնվել էր Իսպանիային, որտեղ փողերի լվացման մեղադրանքով դատապարտվել էր 7,5 տարվա ազատազրկման: Այս տարի հունիսին՝ ազատվելուց ընդամենը 5 օր հետո, նա կրկին ձերբակալվել էր, այս անգամ՝ վրացական իշխանությունների խնդրանքով, քանի որ 2006 թ. Քալաշովն արդեն «հեռակա կարգով» դատապարտվել էր 18 տարվա ազատազրկման:
Վերջերս Քալաշովի արտահանձման մասին էր գրվել նաև ռուսական մամուլում: Լուրեր կային, որ Ռուսաստանը պատրաստվում է մեկ այլ «օրենքով գողի»՝ Տարիել Օնիանիին (Տարո), փոխանակել Քալաշովի հետ, քանի որ Օնիանին էլ իսպանական արդարադատության հետ խնդիրներ ունի, իսկ Քալաշովի դեմ Ռուսաստանում հարուցված քրեական գործեր կան:
Հատկանշական է, որ վերջերս WikiLeaks-ի արտահոսքերում խոսվել էր Քալաշովի և Ռուսաստանի կառավարության կապերի մասին: Ասվում էր, որ Քալաշովի միջոցով ռուսական իշխանությունները զենք են մատակարարել Թուրքիայի քրդական անջատողական կազմակերպություններին:
Փաստաթղթում տեղեկություններ կային, որ Էդուարդ Շևարդնաձեն նույնպես կապեր է ունեցել կազմակերպված հանցավորության հետ:
Ռուս փորձագետ Միխայիլ Տուլսկու կարծիքով, սա վրացական իշխանությունների լուրջ հաջողությունն է, քանի որ Քալաշովը Միխեիլ Սաակաշվիլու երրորդ և միակ կենդանի մնացած խոշոր հակառակորդն է` 2005 թ. մահացած Զուրաբ Ժվանիայից և 2008 թ. մահացած Բադրի Պատարկացիշվիլիից հետո: Քալաշովի արտահանձնումից հետո իշխանությունը կկենտրոնանա Սաակաշվիլու շուրջը` 2013 թ. իշխանությունը հարմար թեկնածուին հաջողությամբ հանձնելու համար: