Եվ այսպես, Երևանը նոր քաղաքապետ կունենա: Հավանական թեկնածու է համարվում Տարոն Մարգարյանը, որը քաղաքի ավագանու ՀՀԿ-ական ցուցակում երկրորդը և ներկայիս փոխքաղաքապետն է: Տեսականում կա նաև Գագիկ Բեգլարյանի վերադարձի հնարավորություն, քանի որ նա իր մանդատը դեռ վայր չի դրել: Բայց այդ տարբերակը գրեթե անհավանական է թվում:
Տարոն Մարգարյանը ՀՀԿ, այսպես ասած, գաղափարական թևի շառավիղն է՝ այդ թևի վաղամեռիկ առաջնորդ Անդրանիկ Մարգարյանի որդին: Այդ իմաստով, Տարոն Մարգարյանի նշանակումը քաղաքապետի պաշտոնում կարող է ընկալվել որպես այսպես ասած տուրք ՀՀԿ գաղափարական թևին: Եվ չի բացառվում, որ դա լինի «վերջին տուրքը»: Բանն այն է, որ, խորհրդարանական ընտրություններին ընդառաջ, Սերժ Սարգսյանն ակնհայտորեն փորձում է վերաձևավորել իր անմիջական շրջապատը, այսպես ասած՝ ռեստրուկտուրիզացիայի ենթարկել իր քաղաքական հենարանը հանդիսացող ՀՀԿ-ն:
Դեռևս մեկ-երկու տարի առաջ սկսվեցին խոսակցություններն այն մասին, որ Սարգսյանը նոր խորհրդարանում ձգտելու է ոչ միայն օլիգարխներին քիչ տեղ տալ, այլ նաև, այսպես ասած, գաղափարական ՀՀԿ-ականներին: Սա ինչ-որ առումով նաև հասկանալի և բնական ընթացք է ոչ միայն քաղաքականության, քաղաքական շահի, այլ նաև ժամանակի տրամաբանության համատեքստում: Խնդիրն այն է, որ ՀՀԿ այդ սեգմենտը վաղուց արդեն կորցրել է իր քաղաքական կենսունակությունը: Այդ սեգմենտը օգտագործվել է Լևոն Տեր-Պետրոսյանի, հետո ավելի լայն մասշտաբով՝ Վազգեն Սարգսյանի, հետո էլ ավելի լայնամասշտաբ ձևով՝ Ռոբերտ Քոչարյանի կողմից: Այսինքն՝ ՀՀԿ այդ սեգմետը քաղաքական ստրատեգիայի համար բավական մաշված ռեսուրս է և այլևս պիտանի չէ այդպիսի խնդիրներ լուծելու համար, հետևաբար խնդիրը դրանից ազատվելն է:
Բայց նաև պարզ է, որ դա պետք է անել համակարգի համար հնարավորինս անցավ ու անցնցում, հակազդեցության ալիք չառաջացնելու համար: Ահա այդ իմաստով, այսպես ասած գաղափարական թևի շառավիղ հանդիսացող Տարոն Մարգարյանին քաղաքապետի պաշտոն տալը ինչ-որ առումով մխիթարություն կարող է լինել այդ թևի համար՝ հանրապետական մասշտաբով նրան իշխանությունից հեռու վանելու դիմաց: Մարգարյանի թեկնածությունը կարող է երկակի հարմարություն ներկայացնել՝ մեկ այդ, մեկ էլ այն իմաստով, որ նա այդուհանդերձ երիտասարդ սերնդի գործիչ է, և կարող է ադեկվատ տեղավորվել ժամանակի պահանջների մեջ: Իսկ եթե չտեղավորվի՝ Դոմինգոն կա ու կա:
