Փորձագետ-նարկոլոգը, որը 2009 թ. մահացած երաժշտության փոփ արքա Մայքլ Ջեքսոնի անձնական բժիշկ Կոնրադ Մյուրեյի դատավարության ընթացքում որպես վկա է հանդես եկել դատարանում, ասել է, որ երաժիշտը, հնարավոր է, կախվածության մեջ է եղել ցավազրկող դեղերից: Այդ մասին հայտնում է РИА Новости գործակալությունը` հղում անելով AFP-ին:
Հիշեցնենք, որ Մայքլ Ջեքսոնը մահացել է 2009 թ. հունիսի 25-ին Լոս Անջելեսում կյանքի 51-րդ տարում:
Հետաքննող մարմնի համաձայն` Մյուրեյը, որը ներկայումս մեղադրվում է չկանխամտածված սպանության մեջ, երաժշտին տվել է չափազանց մեծ քանակությամբ ուժեղ ազդող քնաբեր պրոպոֆոլ դեղամիջոց, որն այլ դեղորայքների հետ մտնելով փոխազդեցության մեջ՝ դարձել է Ջեքսոնի մահվան պատճառ:
Ինչպես ասել է նարկոլոգ Ռոբերտ Ուայլդմենը, որը որպես վկա է կանչվել, երաժիշտը մաշկաբան Առնոլդ Քլեյնի խորհրդով ստացել է չափազանց մեծ չափաքանակով ցավազրկող դեղամիջոցներ, որից նրա մոտ առաջացել է կախվածություն տվյալ տեսակի դեղամիջոցից:
«Կարծում եմ՝ որոշ վկայություններ կան, որ Ջեքսոնը կախվածություն է ունեցել դեմերոլից»,- Ուայլդմենի խոսքերն է մեջբերում գործակալությունը: Վերջինս կարծիք էր հայտնել նաև, որ 2009 թ. մայիսին երգչի մոտ կախվածություն է առաջացել նաև օփիոիդներից:
Ինչպես պնդում է մեղադրյալ կողմի պաշտպանությունը, Մյուրեյը չի իմացել, որ իր հիվանդն ընդունել է նաև դեմերոլ, որը, Ուայլդմենի խոսքով, առաջացնում է ուժեղ անքնություն:
Այս շաբաթ վկայություն է տվել նաև Ջեքսոնի բուժքույրը, որը հայտարարել է, որ երաժիշտն իրեն աշխատանքից ազատել է միայն այն բանի համար, որ ինքը հրաժարվել է նրան տալ ուժեղ քնաբեր:
Այն դեպքում, եթե դատարանը մեղավոր ճանաչի Մյուրեյին, որն, ի դեպ, չի ժխտում փաստը, որ տվել է Ջեքսոնին ոչ մեծ քանակությամբ պրոպոֆոլ, սակայն իրեն մեղավոր չի ճանաչում, նա, հնարավոր է, դատապարտվի 4 տարվա բանտարկության և զրկվի հետագայում բժշկական գործունեությամբ զբաղվելու հնարավորությունից:
