Եգիպտոսի անվտանգության ուժերը բացահայտել են «իսրայելական դավադրություն», ըստ որի՝ Իսրայելը պատրաստվում էր զենք մատակարարել ղպտիներին և ֆիզիկապես ոչնչացնել երկրի կարևոր քաղաքական գործիչներին, այդ թվում՝ նախկին նախագահ Հոսնի Մուբարաքին և ներկայիս նախագահի թեկնածու Մուհամմեդ Ալ-Բարադեյին: Այս մասին գրում է իսրայելական MIGnews գործակալությունը` վկայակոչելով եգիպտական Rose al-Yusuf շաբաթաթերթը:
Ըստ այդ տեղեկության`դավադիրների ցանցի մեջ են մտել 3 իսրայելցի և մեկ եգիպտացի: Մուբարաքի սպանությունը պետք է իրականացվեր վարձկան դիպուկահարի կողմից տարվա սկզբին` եգիպտական Շարմ էլ-Շեյխ քաղաքում, որտեղ Մուբարաքը բուժվում էր:
Թերթի տեղեկություններով՝ խմբի անդամները կարգադրություն էին ստացել Մոսադից: Նրանք պետք է «հմուտ մարդիկ» վարձեին Մուբարաքի և նախագահի ներկայիս թեկնածու Մուհամմեդ Ալ-Բարադեյի սպանության համար: Սակայն Մուբարաքի սպանությունը հետաձգվել է «Շարմ էլ-Շեյխում ուժեղացված վերահսկողության պատճառով»:
Թերթի տեղեկություններն առայժմ այլ աղբյուրների կողմից հաստատված չեն:
