ՀՀ ազգային վիճակագրական ծառայության մարդահամարի եւ ժողովրդագրության բաժնի պետ Կարինե Կույումջյանը լրագրողներին տեղեկացրել է, որ վաղվանից սկսվելու է փորձնական մարդահամարի անցկացումը Հայաստանի Սեւան քաղաքում եւ Տավուշի մարզի Գանձաքար, Գետահովիտ, Աչաջուր, Խաշթառակ բնակավայրերում, եւ այն կավարտվի հոկտեմբերի 30-ին: Իսկ հիմնական մարդահամարը նախատեսված է անցկացնել 2011 թ. հոկտեմբերի 12-21-ը ներառյալ: Մոտ 16 հազար աշխատողներ ներգրավված են հիմնական , իսկ 174 դաշտային աշխատողներ` փորձնական մարդահամարի աշխատանքներում: Ըստ Կարինե Կույումջյանի` ՀՀ կառավարությունը աջակցության խնդրանքով դիմել է բոլոր դոնոր երկրներին եւ միջազգային կազմակերպություններին: Պետբյուջեից ֆինանսավորվում է մարդահամարի աշխատանքների 21 տոկոսը: Արդյունքում` մարդահամարի ամցկացմանն աջակցելու նպատակով հարյուր հազար դոլար տրամադրել է Համաշխարհային բանկը, տասներկու հազար եվրո` Իտալիայի կառավարությունը, քառասունյոթ հազար դոլար` ՄԱԿ-ը, որը փորձնական մարդահամարի աշխատանքներ է իրականացնում: Կարինե Կույումջյանը հիշեցրել է, որ «Մարդահամարի մասին» օրենքով տրամադրվող տեղեկատվությունը գաղտնի է եւ չի հրապարակվում: Հաջորդ տարվա մարտ ամսին կհրապարակվեն նախնական արդյունքները, իսկ հիմնական մարդահամարի արդյունքները կհրապարակվեն մի քանի փուլով:
