«Վրանային ճամբար հանուն Թռչկանի փրկության» ֆեյսբուքյան նախաձեռնության անդամներն «Առաջին լրատվական»-ի միջոցով կոչ են անում բոլոր նրանց, ովքեր անտարբեր չեն իրենց պայքարի նկատմամբ, չվախենալ ու համալրել իրենց շարքերը` հանուն ՀՀ ամենաբարձր և ամենաջրառատ ջրվեժի:
«Հենց հիմա Թռչկանի մոտ, եղանակային խիստ անբարենպաստ պայմաններում (0 աստիճան և անընդհատ տեղացող ձյուն ու անձրև) ընկերովի հերթապահում ենք՝ տեր կանգնելով մեր Թռչկանին: Իսկ ինչո՞ւ ենք մենք մեր առօրյա հոգսերը թողել ու եկել այստեղ. որովհետև մեզ բոլորիս միավորում է մեկ բան՝ սերը հայրենիքի հանդեպ, բայց համոզված ենք, որ մենք մեր հայրենիքը միայնակ չենք սիրում, մեզ սատարում ու աջակցում են քեզ պես բազմաթիվ ուրիշ երիտասարդներ և եթե դու նրանցից մեկն ես, անպայման միացիր մեր պայքարին, հիմա մենք հենց քո օգնության կարիքն ունենք»,- կոչ են անում նախաձեռնության անդամները:
Վերջիններս ցանկացողներին առաջարկում են իրենց միանալու մի քանի ծրագրեր`արշավներ կան նախատեսված հոկտեմբերի 29-ին, 31-ին:
«Թռչկան» վրանային ճամբարի մասնակիցների թվում են Մարիամ Սուխուդյանը, Հասմիկ Վարդանյանը, Սամվել Հովհաննիսյանը,Եղիա Ներսիսյանը, Միքայել Էլիզբարյանը, Տիգրան Շահբազյանը, Արփինե Գալֆայանը, Էմմա Պետրոսյանը, Հրայր Սավզյանը և այլք:
