Յուրաքանչյուր չորրորդ նորվեգացին սկեպտիկորեն է տրամադրված մուսուլմանական երկրներից եկած ներգաղթյալների հանդեպ: Այդ մասին են վկայում Norstat վիճակագրական կենտրոնի անցկացրած հարցախույզի արդյունքները:
Հարցմանը մասնակցածների 25 տոկոսը համամիտ է եղել այն մտքին, որ Նորվեգիայում մուսուլմանների թիվը չափից շատ է, սակայն 49 տոկոսը չեն կիսել այդ տեսակետը: Այդ մասին հայտնում է ИТАР-ТАСС գործակալությունը: Ընդ որում` հարցմանը մասնակցածների 54 տոկոսը կարծում է, որ իսլամը վտանգ չի ներկայացնում իրենց երկրի մշակույթի համար, մինչդեռ 24 տոկոսը համոզված է հակառակում:
Այդ ամենով հանդերձ, 65 տոկոսը բացասաբար է պատասխանել հարցին` ունե՞ն արդյոք իսլամադավան մտերիմ ընկեր:
Norstat-ի հարցումների համաձայն` նորվեգացի տղամարդիկ, ինչպես նաև կրթական ցածր մակարդակ ունեցողները մուսուլմանների հանդեպ տրամադրված են ավելի կասկածամտորեն, քան կանայք և նրանք, ովքեր ունեն բարձրագույն կրթություն:
Բացի այդ` տարբերություն է արձանագրվել մայրաքաղաքում ու շրջաններում հարցմանը մասնակցածների շրջանում: Օսլոյի բնակիչների միայն 6 տոկոսը մտավախություն ունի, որ իսլամը բացասական ազդեցություն կարող է ունենալ իրենց մշակույթի վրա, իսկ Հարավային Նորվեգիայի բնակչության շրջանում տոկոսային հարաբերությունը հասնում է 20 տոկոսի:
Ներկայում Նորվեգիայում, տարբեր հաշվարկներով, ապրում է 100-185 հազար մուսուլման: Վերջիններս կազմում են երկրի բնակչության 4 տոկոսը:
