ԱԺ ԲՀԿ խմբակցության պատգամավոր Վարդան Բոստանջյանն ու Հայ առաքելական եկեղեցու դիվանապետ Արշակ եպիսկոպոս Խաչատրյանը լրագրողների հետ հանդիպման ժամանակ խոսեցին եկեղեցուն պատկանող հողատարածքները և շենքերն ու շինությունները հողի և գույքի հարկերից ազատելու վերաբերյալ օրինագծի մասին:
Բոստանջյանը նկատեց, որ այն հանգամանքը, որ օրենքը առաջին ընթերցմամբ ընդունվել է խորհրդարանում, խոսում է եկեղեցու նկատմամբ եղած հարգանքի մասին: Նրա գնահատմամբ՝ այս օրինագծում խնդիրն այն է, որ այսօր տեղական ինքնակառավարումը հողերի պակաս ու ինքնաֆինանսավորման խնդիր ունի․ «Մենք ձևավորել ենք տեղական ինքնակառավարման համակարգ՝ 96 թ. սկսած, որը մինչ օրս չի գտնվում պատշաճ վիճակում, և դա պայմանավորված է այն հանգամանքով, որ համայնքի զարգացման համար անհրաժեշտ ֆինանսական միջոցները սուղ են, ու հիմնական գումարը գալիս է հողի հարկից, ինչն էլ կամ քիչ է հավաքվում, կամ եթե հավաքվում էլ է, չի բավականացնում զարգացմանը: Ու սա նշանակում է, որ մեր ունեցած միջոցները սուղ են, ու նման օրինագծի ընդունման պարագայում տեղական ինքնակառավարման մարմինները գումարից զրկվում են»:
Նրա ընդդիմախոս Արշակ եպիսկոպոս Խաչատրյանն էլ նկատեց, որ եկեղեցապատկան հողատարածքների հարկերը տեղական ինքնակառավարման մարմինների բյուջեի մեջ չնչին տոկոս են կազմում, և դա մեծ ծանրաբեռնվածություն կամ վնաս չի տալիս համայնքային բյուջեին:
Արշակ եպիսկոպոս Խաչատրյանը նաև նշեց, որ հարկերից ազատվելու հարցը վերաբերում է հիմնականում եկեղեցիների շենքերին ու այն շինություններին, որոնք ծառայում են եկեղեցու գործունեությանը` բարեգործական ճաշարաններ, հայորդյաց տներ: Նա ասաց, որ եկեղեցուն պատկանող պատմամշակութային շենքերն ու շինություններն արդեն իսկ ազատված են հարկերից: Եպիսկոպոս Խաչատրյանը նկատեց, որ օրենսդրական փաթեթում ներառված է եկեղեցապատկան շենքերի ու շինությունների նախնական ցուցակը, որտեղ բոլոր օբյեկտները նշված են այն անուններով, որով գրանցված են կադաստրում, և որպես օրինակ բերեց Շիրակի մարզում ձեռք բերված սրճարանը. «Եթե ոմանք մտածում են, որ եկեղեցու հավատավորը սրճարանի կարիք չունի, սխալվում են: Գռեհկացումն այն աստիճանի հասավ, որ ցուցակի մեջ սկսեցին սաունաներ փնտրել»:
Եպիսկոպխոս Խաչատրյանը նկատեց նաև, որ այսօր խոսվում է 11 մարզադաշտերի մասին, ինչը այդպես չէ և 11մարզադաշտ գոյություն չունի, գոյություն ունի մեկը, և պարզապես դրա տարածքում կան 11 կառույցներ. «Մենք ունենք 5 բարեգործական ճաշարաններ, որից յուրաքանչյուրում սնունդ են ստանում 200 տարիքավոր, ունենք մի քանի հայորդյաց տներ»:
