Միայն այս գիշեր կամ վաղն առավոտ պարզ կդառնա` Թուրքիային օգնություն առաջարկած 30 երկրներից հատկապես որոնք կժամանեն այդ երկիր` սատարելու վերացնել ավերիչ երկրաշարժի հետևանքները: «Առաջին լրատվական»-ի հետ զրույցում այս մասին տեղեկացրեց Ստամբուլում լույս տեսնող «Ակօս» թերթի նախկին խմբագիր Արիս Նալչըն:
Նրա խոսքով՝ սակայն պարզ չէ, թե ինչ ակնկալիքներ կան օգնության առաջարկով Թուրքիայի ԱԳՆ-ին դիմած երկրներից յուրաքանչյուրից, այդ թվում` Հայաստանից:
Նախկին խմբագիրը նաև հիշեցրեց, որ այս պահին Թուրքիայի Վան քաղաքում աշխատում են ընդամենը երկու երկրների` Ադրբեջանի և Իրանի փրկարար ջոկատները` յուրաքանչյուրը բաղկացած 15-ական անդամներից:
Հիշեցնենք, որ 9 բալանոց երկրաշարժը Թուրքիայի Վան քաղաքը ցնցել էր հոկտեմբերի 23-ին: Ցնցումները զգացվել էին նաև Հայաստանում` մասնավորապես Երևանում և Գյումրիում: Երկրաշարժին հետևել էին մի շարք հետցնցումներ:
