Հայաստանի Սահմանադրական դատարանը քննության է ընդունել զրպարտության և վիրավորանքի վերաբերյալ Քաղաքացիական օրենսգրքի դրույթների սահմանադրականության հարցով Հայաստանի մարդու իրավունքների պաշտպան Կարեն Անդրեասյանի դիմումը:
Ինչպես «Առաջին լրատվական»-ին հայտնում են ՍԴ մամուլի ծառայությունից, հաշվի առնելով, որ տվյալ գործը ձեռք է բերել հասարակական մեծ հնչեղություն, որոշվել է գործի դատաքննությունն անցկացնել բանավոր ընթացակարգով։ Դատաքննությունն սկսվելու է նոյեմբերի 15-ին:
Սահմանադրական դատարանի մամուլի ծառայության տեղեկացմամբ՝ կարևորելով իրավական նորմի սահմանադրականության առնչությամբ տվյալ խնդրի արագ լուծման անհրաժեշտությունը` դատարանը որոշել է հետաձգել այլ գործերի քննությունը:
Նշենք, որ ՄԻՊ Կարեն Անդրեասյանն այսօր լրագրողների հետ զրույցում ասել էր, որ մինչև նոյեմբերի 15-ը մեկնաբանություններով հանդես գալ չի ցանկանում՝ հավելելով, որ ՍԴ-ից դրական ակնկալիքներ ունի:
Հիշեցնենք, որ օրեր առաջ 8 թերթերի խմբագիրներ հանդես էին եկել հայտարարությամբ, որում մասնավորապես ասված է.
«Մենք` Հայաստանում լույս տեսնող թերթերի ներքոստորագրյալ խմբագիրներս, ՀՀ քաղաքացիական օրենսգրքի հոդված 1087.1-ով սահմանված դրույթները և դրանց դատական կիրառումը համարում ենք հակասահմանադրական, որի հեռահար նպատակը ՀՀ քաղաքացիներին տեղեկատվական տպագիր այլընտրանքներից զրկելն է: Սահմանադրական դատարանին կոչ ենք անում մինչև վերջնական որոշման կայացումը միջոցներ գործադրել Քաղաքացիական օրենսգրքի վիճարկվող հոդվածի գործնական կիրառումը կասեցնելու նպատակով»:
