Տառատեսակների 4-րդ՝ «Գրանշան 2011» միջազգային մրցույթի արդյունքում հայերեն նոր տառատեսակներ են ստեղծվել: ՀՀ մշակույթի նախարարությունում տեղի ունեցած մամուլի ասուլիսի ժամանակ այս մասին հայտարարեց մշակույթի նախարարության մշակութային ծրագրերի և մոնիտորինգի վարչության գլխավոր մասնագետ Գառնիկ Գույումջյանը:
Ասուլիսին ներկա, մրցութային հանձնաժողովի համանախագահ Էրիկ Ղաբուզյանն իր հերթին նկատեց, որ մրցույթը մեծ հեղինակություն և ճանաչում ունի աշխարհում: «Այն հանգամանքը, որ մրցույթը անց է կացվում ATypI-ի (Տառաստեղծների և դիզայներների համաշխարհային միություն) հերթական համաժողովին զուգընթաց, վկայում է, որ տառարվեստի դիզայնի ասպարեզում այս մրցույթը աննախադեպ հաջողություններ ունի: Լատինական տառատեսակներ մրցույթում ներկայացված չեն, քանի որ լատինական այբուբեններն, այսպես թե այնպես, մշտապես ուշադրության կենտրոնում են, և դրանց նվիրված բազմաթիվ այլ մրցույթներ կան:
Ինչ վերաբերում է «Գրանշան 2011» միջազգային մրցույթի այս տարվա հաղթողներին, ապա «Հայակական տեքստային տառատեսակներ» անվանակարգում առաջին կարգի մրցանակ, ցավոք, չի շնորհվել, երկրորդ կարգի մրցանակ շնորհվել է «Արեգակ» տառատեսակին` ստեղծված Հրաչուհի Գրիգորյանի կողմից` (Հայաստան), երրորդ տեղում «Էմրիս» տառատեսակն է` ներկայացված Բեն Ջոնսի կողմից (Միացյալ Թագավորություն)»,- նկատեց Էրիկ Ղաբուզյանը` նկատելով, որ իրենց դիմել են նաև արտասահմանցի բազմաթիվ այլ դիզայներներ` առաջարկելով մրցույթում ներառել արաբական և հնդկական տառատեսակների անվանակարգ:
Նրա տեղեկացմամբ, ներկայացված մյուս` «Կիրիլյան տեքստային տառատեսակներ» անվանակարգում, հաղթող է ճանաչվել «Վիլյամ» տառատեսակը` հեղինակված ռուսաստանցի Մարիա Դորեուլիի կողմից: «Հունական տեքստային տառատեսակների առաջին հորիզոնականում կրկին Բեն Ջոնսն է` իր «Էմրիս» տառատեսակով: Ինչ վերաբերում է չորրորդ և վերջին` ազատ ոճի տառատեսակներին, ապա առաջին կարգի մրցանակ շնորհվել է «Բելոդոննա»-ին` ստեղծված Ալեքսանդրա Կորոլկովայի կողմից (Ռուսաստան): Հենց այս տառատեսակի համար է վերջինիս տրվել «Գլխավոր մրցանակը» և 1000 եվրո պարգևը»,- տեղեկացրեց Էրիկ Ղաբուզյանը:
Ասուլիսին ներկա, մրցութային հանձնաժողովի անդամ Մանվել Շմավոնյանն իր հերթին նկատեց, որ տառարվեստով զբաղվելու ցանկություն ունեցող երիտասարդների թիվը Հայաստանում շատ քիչ է: «Մենք պատրաստ ենք օգնել և մեր փորձը փոխանցել բոլոր ցանկացողներին: Ինքնուսուցումը կարող է բերել որոշակի մակարդակի, սակայն միջազգային ասպարեզում սեփական խոսքն ասելու համար պետք է մասնագետների մոտ սովորել: Ընդ որում, տառարվեստ սովորեցնող առանձին դպրոցներ կամ ուսումնական հաստատություններ գոյություն չունեն՝ ինչպես Հայաստանում, այնպես էլ ամբողջ աշխարհում»,- նկատեց նա:
Շմավոնյանի խոսքով՝ ինչ վերաբերում է վեբ-դիզայնին, այս պարագայում միայն դիզայներական աշխատանքը բավարար չէ, և առաջին հայացքից նորմալ մշակում անցած տառատեսակները տեխնոլոգիական լուրջ մշակումների կարիք ունեն:
Նշենք, որ Տառատեսակների 4-րդ՝ «Գրանշան 2011» միջազգային մրցույթն այս տարի անցկացվել է սեպտեմբերի 14-15-ը` Իսլանդիայի մայրաքաղաք Ռեյկյավիկում: