Հրազդանցիները պայքարում են երկաթահանքի շահագործման դեմ: Խնդրի շուրջ ձևավորված քաղաքացիական նախաձեռնությունը որոշել է առողջ միջավայրում ապրելու իր իրավունքը պաշտպանել դատական ատյաններում: Նախաձեռնությունը արդեն իսկ հանդիպում-քննարկում է կազմակերպել բնապահպանների հետ, ովքեր Հրազդանի բնակիչների հետ կիսել են հանքի շահագործմանը վերաբերող մտահոգությունները: Այս մասին «Առաջին լրատվական»-ին տեղեկացրեց հանդիպմանը ներկա գտնված բնապահպաններից մեկը:
Խնդրի առնչությամբ միակարծիք են բոլոր բնապահպանները և բնակիչները, ովքեր վստահեցնում են, որ քաղաքին մոտ գտնվող հանքի շահագործումը կաղտոտի ոչ միայն օդը, այլև Հրազդան գետի ջուրը, որով ոռոգվում են մոտակա հողատարածությունները:
Հրազդանցիները շարունակելու են շահագործման դեմ ակցիաներ կազմակերպել. կոչերով և ցուցապաստառներով բարձրանալ ապագա հանքավայրի տարածք և զրուցել, պատմել իրենց մտահոգությունների մասին՝ հորատման աշխատանքներ իրականացնող անձանց հետ:
Հրազդանի երկաթահանքի շահագործման դեմ ձևավորված նախաձեռնող խումբը 10-օրյա ժամկետ է առաջարկել հորատող կազմակերպությանը՝ շահագործմանն ուղղված աշխատանքները դադարեցնելու համար: Հրազդանի երկաթահանքի շահագործման դեմ պայքարող նախաձեռնող խումբն այժմ զբաղված է առողջ միջավայրում ապրելու իրավունքը դատական ատյանում պաշտպանելու համար անհրաժեշտ փաստաթղթեր հավաքելով:
