Երևանի «Մխիթար Սեբաստացի» կրթահամալիրի ուսուցիչների և բարձր դասարանցիների 30 հոգանոց խումբն այսօր` հոկտեմբերի 25-ին, առավոտյան ժամը 9-ին, մեկնել է Վրաստան:
Կրթահամալիրից Առաջին լրատվական»-ին հայտնում են, որ հոկտեմբերի 25-29-ին, Թբիլիսիում կրթահամալիրի էկոլոգները միջազգային SPARE (էներգիայի և ռեսուրսների օգտագործման դպրոցական ծրագիր) նորվեգական ծրագրով կրթահամալիրում իրականացված նախագծերն են ներկայացնելու գործընկեր դպրոցներում, ծանոթանալու են վրացական կողմի փորձին, 2012թ. համատեղ անցկացվելիք էկոտուրի նախագիծն են քննարկելու։ Օտար լեզուների-թարգմանչության, կինոֆոտոգործի խորացված ուսուցման սովորողներն իրենց վրացերենի և մշակութային-լրագրողական մասնագիտական փորձառությունն են անցկացնելու: Կրթահամալիրի ուսուցիչների և սովորողների խումբը թբիլիսյան գործընկերներ դպրոցների և այլ կազմակերպությունների հետ քննարկելու-ճշգրտելու է Հայաստանի և Վրաստանի ԿԳ նախարարությունների հավանությանն արժանացած «Հանրակրթական կամուրջներ» նախագծով 2011-2012 թթ միջոցառումների ծրագիրը:
Այցի փոխադրման ծախսերը հոգացել է միջազգային SPARE ծրագիրը, նախապատրաստական աշխատանքների հետ կապված մյուս ծախսերը հոգացել է կրթահամալիրի աշխատողների արհմիութենական կազմակերպությունը։ Խումբը Վրաստանի կրթության և գիտության աշխատողների ազատ արհմիությունների խորհրդի հրավերով գիշերելու է Թբիլիսիի «Ծխնեթի» հանգստյան տանը։