Ադրբեջանական 1news.az-ի փոխանցմամբ՝ Ադրբեջանի նախագահ Իլհամ Ալիևն անդրադարձել է իր երկրի՝ ՄԱԿ-ի ԱԽ ժամանակավոր անդամ ընտրվելուն.
«Ինչպես հայտնի է, Ադրբեջանը դիմել էր ՄԱԿ ԱԽ ժամանակավոր անդամ ընտրվելու համար։ Այդ նպատակին հասնելու համար մեր դիվանագիտությունը վերջին ամիսներին մեծ աշխատանք է տարել։ Հնարավոր է՝ ադրբեջանական հանրությունը տեղյակ չէ, որ սկզբնական շրջանում Հայաստանը նույնպես առաջադրել էր իր թեկնածությունը։
Սակայն մի քանի ամիս առաջ, նրանք, հավանաբար մտածելով ու հասկանալով, որ դիվանագիտական արենայում չեն կարող մրցակցել Ադրբեջանի հետ, շատ հանդարտ, անաղմուկ հետ վերցրին իրենց թեկնածությունը։ Այսինքն՝ դա ինքնաբերաբար ցույց տվեց, որ նրանք «անօգնական» են Ադրբեջանի համեմատ և «խոստովանում» են դա։ Կրկնում եմ, նրանք դա արեցին շատ կամացուկ, որպեսզի այդ «խայտառակության» մասին չիմանան շատ մարդիկ, շատ երկրներ։
ՄԱԿ-ում Ադրբեջանի տարած հաղթանակը վկայում է միջազգային հանրության կողմից Ադրբեջանի ճանաչման մասին։ Հուսալի գործընկեր լինելը մեծ պատասխանատվություն է և մեծ նվաճում։ Մենք, հիրավի, հուսալի գործընկեր ենք։
Ոմանց դուր է գալիս մեր քաղաքականությունը, իսկ ոմանց էլ՝ ոչ։ Մենք չենք փորձում դուր գալ բոլորին։ Մենք վարում ենք մեր քաղաքականությունը, մեր խոսքն ու գործը չի տարբերվում միմյանցից։ Ոչ վաղ անցյալում (հոկտեմբերի 18) մենք նշեցինք Ադրբեջանի անկախության 20-ամյակը։ Այս հաջողությունն այդ 20 տարիներին ունեցած ձեռքբերումների տրամաբանական արդյունքն է»։
