Մենք` հայերս, փաստացի պատրաստ չենք դիմավորել երկրաշարժն այնպես, որ դրա արդյունքում հնարավորինս քիչ վնասներ կրենք: Այսօր տեղի ունեցած մամուլի ասուլիսի ժամանակ այս մասին հայտարարեց սեյսմոլոգ Վլադիմիր Բալասանյանը` հավելելով, որ Հայաստանի տարածքը գտնվում է Երկիր մոլորակի երեք ամենաակտիվ սեյսմիկ գոտիների մեջ, և մեր երկրի տարածքում երկրաշարժները նորություն ու անակնկալ չեն:
Նրա խոսքով` սեյսմիկ գոտիներից մեկը՝ հիմալայան գոտին է, որտեղ և գտնվում է մեր հանրապետության տարածքը: «Ապրելով այսպիսի տարածքում, որ երկրաշարժները եղել են, լինում են և լինելու են, այնպես որ, ավելի ճիշտ կլինի ոչ թե խուճապի մատնվել, այլ սովորել` ինչպես ապրել և ինչ վարք դրսևորել երկրաշարժների ժամանակ: Մեզանում նման իրավիճակներում հաճախ խուճապ է առաջանում, մենք փաստացի պատրաստ չենք դիմավորել երկրաշարժն այնպես, որ հնարավորինս քիչ վնասներ կրենք:
Մինչդեռ Ճապոնիայում նույնիսկ փոքրահասակ երեխաները մեզանից լավ գիտեն` ինչպես իրենց պահել երկրաշարժների ժամանակ»,- նկատեց սեյսմոլոգը` հավելելով, որ շենքերն ու շինությունները պետք է կառուցել այնպես, որ դրանք հնարավորինս լավ դիմանան ցնցումներին:
«Հայաստանում, սկսած խորհրդային ժամանակներից, գոյություն ունեին շինարարական նորմեր` հաստատված կառավարության կողմից: Դրանց կից կազմվում էին շրջակայքի սեյսմիկ քարտեզներ: Շինարարներն ուղղորդվում էին այդ քարտեզներով: Այսօրվա դրությամբ դժվարանում եմ ասել` ով պետք է պատասխան տա շենքերի սեյսմակայունության համար, կարծում եմ` բոլորը: Երևան քաղաքում այդ պատասխանատվությունը պետք է կրի քաղաքապետարանը, քանի որ շինարարությունն այժմ մասնավոր ընկերություններն են իրականացնում»,- համոզմունք հայտնեց Վլադիմիր Բալասանյանը:
Սեյսմոլոգը նաև նկատեց, որ Թուրքիայի Վան քաղաքում օրերս տեղի ունեցած երկրաշարժը Հայաստանի վրա կարող է անդրադառնալ, ասենք, քսան, հիսուն տարի հետո, բայց կարող է նաև ընդհանրապես չանդրադառնալ:
Հիշեցնենք, որ Թուրքիայում 9 բալանոց ավերիչ երկրաշարժը տեղի էր ունեցել հոկտեմբերի 23-ին: Ցնցումները զգացվել էին նաև Հայաստանում` մասնավորապես Երևանում ու Գյումրիում:
