News Georgia-ի փոխանցմամբ՝ Թուրքիայում գտնվող վրացական տաճարներին իրավական կարգավիճակի շնորհման մասին որոշումը վերջնականապես կայացված չէ։ Այս մասին այսօր տեղի ունեցած ճեպազրույցի ժամանակ հայտարարել է Վրաստանի փոխարտգործնախարար Նինո Կալանդաձեն։
Վերջինս նշել է. «Մենք ունենք մեր առաջարկները, և հուսով ենք, որ դրանք հաշվի կառնվեն Թուրքիայի կողմից։ Թուրքական կողմը նույնպես ունի իր առաջարկները։ Տվյալ որոշումը պետք է կայացնեն իրավասու մարմինները։ Խնդրի շուրջ բանակցությունները շարունակվում են, թեև հարցի վերաբերյալ վերջնական որոշումը դեռևս չի կայացվել։ Այս հարցը բավական այժմեական է թե՛ մեր պատրիարքարանի, թե՛ մեր բնակչության համար»։
Հիշեցնենք, որ հոկտեմբերի 20-ին եռօրյա բարեկամական այցով Թուրքիա այցելած Վրաստանի պատրիարք Իլյա 2-րդը պաշտոնական Անկարային կոչ է արել իր երկրին վերադարձնել Թուրքիայի տարածքում գտնվող վրացական տաճարները՝ պաշտոնական նամակով դիմելով թուրքական կառավարությանը և ընդգծելով, որ թուրքական իշխանությունները երկրում գտնվող կրոնական ունեցվածքը վերադարձրել են հույներին, հայերին, ռուսներին, սակայն նույն կերպ չեն վարվել վրացիների պարագայում։
