Ալժիրի կառավարությունը չի պատրաստվում իր տարածքում գտնվող Մուամար Քադաֆիի ընտանիքի անդամներին հանձնել Լիբիայի նոր իշխանություններին: Այս մասին հայտնում է ալժիրյան Le soir d`Algerie թերթը` վկայակոչելով իրազեկ աղբյուրները:
Բացի այդ, Ալժիրի իշխանությունները չեն պատրաստվում քննարկել Քադաֆիի հարազատների ճակատագիրը ոչ մի երկրի հետ, բացի ՄԱԿ-ից:
«Ալժիրը չի հանձնի Քադաֆիի հարազատներին ո՛չ Լիբիային, ո՛չ էլ որևէ այլ երկրի: Նրանք ընդունվել են մարդասիրական նկատառումներով, և այս առումով նրանց շուրջ իրավիճակը չի փոխվել»,- հայտարարել է աղբյուրը:
Ալժիրում համոզված են, որ Լիբիայի զոհված առաջնորդի հարազատների ճակատագիրը կարող է որոշվել միայն միջազգային մակարդակում` ՄԱԿ-ի շրջանակներում: Աղբյուրը նշել է, որ Քադաֆիի կինը, նրա դուստրը և երկու որդիները գտնվում են գաղտնի ապաստարանում՝ հսկողության տակ:
Քադաֆիի ընտանիքը Ալժիր է տեղափոխվել օգոստոսի 29-ին:
