Հոկտեմբերի 25-ին, ժամը 12.00ին, Հայաստանում Իտալիայի պատվո հյուպատոսության հիմնադրման 10-րդ, Իտալիայի Միասնության 150-րդ և Հայաստանի անկախության 20-րդ տարելիցին, Գյումրիում (Աբովյան փող. 182) կկայանա Խաղաղության և զարգացման միջազգային կենտրոնի բացման արարողությունը:
Կենտրոնի հիմնական նպատակն է ստեղծել բարենպաստ միջավայր մշակութային փոխադարձ շփումների, մշակութային տարբեր ինքնությունների միջև ազատ երկխոսության ծավալման, փոխճանաչողության և փոխըմբռնման համար՝ հատկապես կարևորելով Կովկասյան տարածաշրջանի, ինչպես նաև՝ թուրքական մշակութային ինստիտուտների ընդգրկումը այս գործընթացում: Կենտրոնի այլ ծրագրերի մեջ են նաև տարբեր տիպի կրթական և մասնագիտական պատրաստությունը, լեզուների ուսուցումը, մտավորական տուրիզմի խթանումը և պատմա-մշակութային ժառանգության վերանորոգությունն ու վերարժևորումը:
Պատվո հյուպատոս Անտոնիո Մոնտալտոն առաջին անգամ Հայաստան է ժամանել 1988 թ. երկրաշարժից անմիջապես հետո: Մասնագիտությամբ բժիշկ՝ տարիներ շարունակ աշխատել է հիմնականում առողջապահության ոլորտում՝ ի գործ բերելով մայրության և մանկանց խնդիրներին վերաբերող ծրագրեր: Վերջին ժամանակներին նա ուշադրությունն առավել ուղղել է դեպի մասնագիտական պատրաստության բնագավառը՝ հատկապես տուրիզմի կազմակերպման և արհեստների (խեցեգործություն, գորգագործություն) խթանման գործում կայուն աշխատատեղերի ստեղծման մտահոգությամբ:
Խաղաղության և զարգացման միջազգային կենտրոնի հիմնադրումը ներգծվում է ավելի լայն ծրագրի շրջանակներում, որն է՝ Գյումրու պատմական կենտրոնի նյութական և հոգևոր վերագնահատումը:
