Թուրքական Anadolu գործակալության փոխանցմամբ՝ Թուրքիայի արտգործնախարար Ահմեդ Դավութօղլուն լրագրողներին հայտնել է, որ երեկ Իրանի արտգործնախարար Ալի Աքբար Սալեհի հետ հանդիպման ժամանակ իրանական կողմին խորհուրդ է տվել լրջորեն վերաբերվել ԱՄՆ-ի մեղադրանքներին, որը վերաբերում է ԱՄՆ-ում Սաուդյան Արաբիայի դեսպանի նկատմամբ մահափորձ պատրաստելուն.
«Բավական լուրջ է այն մեղադրանքը, որն առնչվում է մի երկրի կողմից մյուս երկրի դեսպանի նկատմամբ երրորդ երկրում մահափորձի նախապատրաստմանը։ Այդպիսի մեղադրանքները պետք է ուշադիր ու մանրակրկիտ քննել։ Հենց այդ մասին ես խորհուրդ տվեցի Իրանի արտգործնախարարին։ Իրանը պետք է լրջորեն ընդունի ԱՄՆ-ի մեղադրանքները և քայլեր ձեռնարկի՝ իրավիճակի վրա լույս սփռելու ուղղությամբ»։
Հիշեցնենք, որ օրեր առաջ Իրանի նախագահ Մահմուդ Ահմադինեժադը Al Jazeera հեռուստաընկերության հետ հարցազրույցի ժամանակ հերքել էր ամերիկյան այդ մեղադրանքը՝ ընդգծելով, որ իրանական իշխանությունները դրա վերաբերյալ անգամ հետաքննություն չեն անցկացնի, որովհետև ԱՄՆ իշխանություններն ամեն օր մի նոր մեղադրանք են հնչեցնում Իրանի դեմ, և եթե իրենք փորձեն այդ բոլոր մեղադրանքների գծով հետաքննություն անցկացնել, ապա ողջ աշխատանքային գրաֆիկը կհագենա դրանով:
