Ընդդիմությանը նոր առաջնորդ է հարկավոր: Այսօր լրագրողների հետ հանդիպման ժամանակ, անդրադառնալով ընդդիմությանը, այսպես ասաց Մարքսիստական կուսակցության ղեկավար Դավիթ Հակոբյանը` հավելելով, որ այս մասին ասել է դեռևս տարիներ առաջ: «Ես վերջին նախագահական ընտրությունների ժամանակ հայտարարել էի, որ ընդդիմությանը նոր առաջնորդ է հարկավոր, իմ ասածը կատարվեց: Մենք այսօր լուրջ ընդդիմություն չունենք»,- նշեց Դ. Հակոբյանը` հնարավոր համարելով խորհրդարանական ընտրություններիի ընդդիմության բոյկոտը: Սակայն, նրա կարծիքով, սա նույնպես ընդդիմությանը չի փրկի, քանի որ այդպես էլ համազգային շարժում չձևավորվեց:
Խոսելով գալիք խորհրդարանական ընտրություններից` նա ասաց, թե այսօր այն պահն է, որ կապիտալով պառլամենտ գնել հնարավոր չէ: «Պառլամենտը ազգի ուղեղն է և միտքը: Եթե այսօրվա բթամիտ, գաղափարապես սնանկ խորհրդարանի տեղը չձևավորենք լավ մտքի տեր պառլամենտ, հետագայում կործանարար հետևանքներ կարող են լինել»,- մեկնաբանեց Դ. Հակոբյանը: Ըստ նրա` այս տեսակետից նախագահը լուրջ մտածելու խնդիր ունի և պետք է հետևի Վլադիմիր Պուտինի օրինակին` լուրջ մարդկանց հրավիրի, նվաճի ժողովրդի սիրտը:
«Ժողովուրդը կորցրել է հավատը հանրապետականների նկատմամբ, եթե նրան փորձեն կապիտալի ուժով, տեռորիզմով պառլամենտ ունենալ, ապա կտապալվեն, քանի որ համաժողովրդական պոռթկում կսկսվի: Այսպես ժողովուրդ չեն պահում. ժողովուրդը կանգնած է կենսաբանական գենոցիդի առջև»,- վերլուծեց Մարքսիստական կուսակցության առաջնորդը:
Նա նաև նշեց, որ եթե որևէ մեկը հույս ունի, թե կոալիցիան ամուր կառույց է գաղափարական և շահերի համընկնման առումով, ապա սխալվում է: «ԲՀԿ-ն կսատարի նախագահին միայն այն դեպքում, երբ ստանա երկրի իշխանության երեք տեղերից մեկը, իմ կարծիքով՝ վարչապետի պաշտոնը»,- ամփոփեց Մարքսիստական կուսակցության ղեկավարը:
