Այսօր ՀՀ կառավարության ընդունելությունների տանը մեկնարկեց համաժողով՝ նվիրված ՀՀ աղետների, ռիսկերի նվազեցման ազգային ռազմավարությանը: Համաժողովը կազմակերպվել է ՀՀ արտակարգ իրավիճակների նախարարության, ՄԱԶԾ հայաստանյան գրասենյակի և «Աղետների ռիսկերի նվազեցման ազգային պլատֆորմ» հիմնադրամի կողմից:
Ինչպես իր բացման խոսքում նշեց ՀՀ արտակարգ իրավիճակների նախարար Արմեն Երիցյանը, նախարարություն ստեղծելը աղետների, ռիսկերի նվազեցման առաջին քայլն է եղել: «Մենք ճիշտ ուղու վրա ենք, և մեր կողքին են նախարարությունները, միջազգային կազմակերպությունները, հասարակական կազմակերպությունները»,- նշեց Ա. Երիցյանը` ընդգծելով, որ աշխատանքների ռազմավարությունը ներկայացնելու ժամանակն է:
Հանդիպմանը ներկա էին ՀՀ տարբեր նախարարությունների և գերատեսչությունների ղեկավարներ, մարզպետներ, դեսպանատների և միջազգային կազմակերպությունների ներկայացուցիչներ:
Համաժողովի նպատակն է ներկայացնել ՀՀ ԱՌՆ համակարգի վերջին տարիների ձեռքբերումները, նախանշել այդ համակարգի զարգացման ուղղությունները և շարունակել ԱՌՆ համակարգի արագ և կայուն զարգացմանն ուղղված հետագա քայլերը: Համաժողովի ընթացքում Կապան և Ալավերդի քաղաքների ներկայացուցիչները կստորագրեն ՄԱԿ-ի «Իմ քաղաքը պատրաստվում է աղետների, ռիսկերի նվազեցման քարոզարշավին» միանալու վկայականը: Տեղի ունեցավ նաև աղետների նվազեցման միջազգային օրվան նվիրված «Ձայն բազմաց» լուսանկարչական ցուցահանդեսի բացումը և մրցանակակիրների պարգևատրումը: Համաժողովը տևելու է մեկ օր, որի ընթացքում իրենց զեկույցներով են հանդես գալու Հայաստանում ՄԱԿ-ի մշտական համակարգող Դաֆինա Գերչևան, Ալավերդու քաղաքապետ Արտավազդ Վարոսյանը, Կապանի քաղաքապետ Արթուր Աթայանը և ուրիշներ: Համաժողովի փակումը տեղի կունենա ժամը 17.30-ին:
