ԱՊՀ-ն կառույց է, որն իրենից Ռուսաստանի հետ տնտեսական և քաղաքական հարաբերություններ ստեղծելու հեշտացված ճանապարհ է ներկայացնում. «Առաջին լրատվական»-ի հետ զրույցում նման տեսակետ հայտնեց Ռազմավարական և ազգային հետազոտությունների հայկական կենտրոնի փորձագետ Մանվել Սարգսյանը:
«Սա մի հարթակ է, ուր Ռուսաստանը հնարավորություն ունի խոսելու հետխորհրդային երկրների հետ, ճշտելու նրանց ինտեգրացիոն կողմնորոշումները, նոր նախաձեռնություններ սկսելու և այլն: Ինչպես նախկինում, այնպես էլ հիմա, Ռուսաստանը փորձ է անում ուժեղացնել ԱՊՀ-ն: Այդ փորձերը հիմա էլ շարունակվում են: Դրա վկայություններից մեկն էլ անդամ երկրների մասնակցությամբ ստեղծված ռազմական կառույցն է` ՀԱՊԿ-ը»,- նկատեց փորձագետը:
Անդրադառնալով կառույցի` Հայաստանի վրա ունեցած տնտեսական և քաղաքական ազդեցությանը` Մանվել Սարգսյանը նկատեց, որ մեր երկրի համար ԱՊՀ-ն բազմակողմանի նշանակություն ունի: «ԱՊՀ-ի դերը Հայաստանի համար բավական էական է: Բացի այն, որ անդամ երկրները ճանաչում են միմյանց սահմանները, նաև հնարավորություն են ստանում տնտեսական կապեր հաստատել ինչպես Ռուսաստանի, այնպես էլ միմյանց հետ»,- նկատեց փորձագետը:
Նշենք, որ Հայաստանի վարչապետ Տիգրան Սարգսյանը Սանկտ Պետերբուրգում ընթացող՝ ԱՊՀ երկրների կառավարությունների ղեկավարների խորհրդի նիստի ժամանակ նշել էր. «Այսօր պատմական օր է, որովհետև, եթե անկեղծ լինենք, մենք ազատ առևտրի գոտի ստեղծելու պայմանագրի վրա իրականում աշխատել ենք 20 տարի։ Այս տարի լրանում է ԱՊՀ-ի հիմնադրման 20-ամյակը, և ինձ թվում է` այս նշանակալից օրը հաստատում է, որ ԱՊՀ-ն շարժվում է ճիշտ ուղղությամբ»:
Նշենք նաև, որ ԱՊՀ անդամ երկրներ են հանդիսանում նախկին խորհրդային 11 երկրներ։ Վրաստանը այդ կառույցից դուրս էր եկել 2008 թվականի օգոստոսյան պատերազմից հետո:
