«Հրապարակ» օրաթերթի գլխավոր խմբագիր Արմինե Օհանյանը հույս ունի, որ Հայաստանի ՄԻՊ-ի` զրպարտության և վիրավորանքի վերաբերյալ Քաղաքացիական օրենսգրքի դրույթների հակասահմանադրականության խնդրով Սահմանադրական դատարան դիմելու նախաձեռնությունը հաջողությամբ կպսակվի, և նրա դիմումը եթե ոչ ամբողջությամբ, ապա գոնե մասնակի կբավարարվի: Այս մասին նա ասաց «Առաջին լրատվականի» հետ զրույցում:
«Եթե Կարեն Անդրեասյանը պետք է դիմի դատարան և մերժվի, նշանակում է` իշխանությունները նրան դնում են անհեթեթ և խեղկատակ վիճակի մեջ: Սակայն կարծում եմ` նրանք չեն ցանկանա ՄԻՊ-ին ծիծաղելի իրավիճակի մեջ գցել»,- նկատեց Արմինե Օհանյանը:
Նա միաժամանակ ընդգծեց, որ եթե Կարեն Անդրեասյանը նման նախաձեռնություն է սկսել, գաղափարն արդեն իսկ իր մեջ դրական հատիկ է պարունակում: «Մտավախություն կա, որ նախընտրական շրջանում լրատվամիջոցների դեմ դատական բազմաթիվ գործեր կհարուցվեն, բայց միաժամանակ հույս ունենանք, որ գոնե մոտակա մեկ տարում ազատ կշնչենք ու դատարանների ճնշումներից զերծ գործունեություն կծավալենք»,- ամփոփեց «Հրապարակ» օրաթերթի խմբագիրը:
Նշենք, որ հայաստանյան 8 պարբերականների խմբագիրներ, այդ թվում` Արմինե Օհանյանը, այսօր Սահմանադրական դատարանին կոչ են արել կասեցնել Քաղաքացիական օրենսգրքի «Զրպարտության» և «Վիրավորանքի» հոդվածների կիրառումը: Նրանց ստորագրած հայտարարությունում մասնավորապես ասվում է.
«ՀՀ Քաղաքացիական օրենսգրքում 2010 թվականին կատարված փոփոխությունները (հոդված 1087.1), որոնց հայտարարված նպատակը «Զրպարտություն» և «Վիրավորանք» հասկացությունների ապաքրեականացումն էր, վեր են ածվել խոսքի ազատության, տեղեկություններ փնտրելու, ստանալու և տարածելու սահմանադրական նորմերի գործնական կիրառումը խոչընդոտող գործիքի: Մեծացող հաճախականությամբ տպագիր լրատվամիջոցների դեմ դատական հայցեր են հարուցվում, որոնց հիմնական նպատակը մեծ տուգանքների գնով թերթերի գործունեությունը դադարեցնելն է կամ նրանց ներքին գրաքննության կանոններ պարտադրելը»:
Հիշեցնենք, որ Հայաստանի ՄԻՊ-ը 2009 թվականին օրենսդրական փոփոխության մի գաղափար էր առաջարկել, որի էությունը կայանում էր զրպարտությունն ու վիրավորանքը ապաքրեականացնելու և այդ արարքների համար քաղաքացիաիրավական պատասխանատվություն սահմանելու մեջ: Անցյալ տարվա մայիսին օրենսդրական փոփոխությունն ընդունվել էր, ինչից հետո տպագիր մամուլի դեմ ավելի քան 15 հայց է ներկայացվել։
