Այսօր համաշխարհային բանկի Եվրոպա և Կենտրոնական Ասիա (ԵԿԱ) տարածաշրջանի` Աղքատության կրճատման և տնտեսական կառավարման ստորաբաժանումը ներկայացրել է «Հայաստան` պետական ծախսերի ուսումնասիրություն. հարկաբյուջետային կոնսոլիադացում և վերականգնում» զեկույցը: Այն կազմվել է ԵԿԱ տարածաշրջանի ԱԿՏԿ թիմի, ֆինանսների նախարարության և ՊԵԿ-ի սերտ համագործակցությամբ: Լրագրողների հետ հանդիպման ժամանակ ՀԲ ԱԿՏԿ ստորաբաժանման ոլորտային տնօրեն Իվոն Ցիկատան նշեց, որ, չնայած ծանր ճգնաժամին, Հայաստանի դիրքը բավականին կայուն և ամուր է. «Սա Հայաստանի կառավարությանը հնարավորություն տվեց ներդնել ֆիսկալ մի փաթեթ, որը խթանեց տնտեսությունը»:
Ֆինանսների նախարար Վաչե Գաբրիելյանի խոսքով` սա Հայաստանի պատմության մեջ նման երկրորդ զեկույցն է: Առաջինը եղել է 2000 թվականին, և համաշխարհային բանկի հետ մանրամասն քննարկվել է պահուստային, ծախսային և պարտքային ուղղությունները:
Զեկույցում գնահատվում է ՀՀ եկամտային ներուժը, որը կառավարությունը կարող է օգտագործել` անդրադառնալով հարկային վարչարարությանը և անհրաժեշտ հարկային քաղաքականությանը: Պատասխանելով լրագրողներից մեկի հարցին, թե ՊԵԿ նախագահ Գագիկ Խաչատրյանը դժգոհություն էր արտահայտել 2012 թվականի բյուջեի նախագծում հարկային բազայի 100 միլիարդ դրամով ավելացման վերաբերյալ և ինչպե՞ս կանդրադառնան հարկային վարչարարության բարեփոխումները հարկերի հավաքագրման վրա, Վ. Գաբրիելյանն ասաց, որ հարկային վարչարարության բարեփոխումները չեն կարող անդրադառնալ հարկային մուտքերի ծավալի վրա:
