Թուրքական Enson Haber կայքի փոխանցմամբ՝ Թուրքիայի արտգործնախարար Ահմեդ Դավութօղլուն իշխող «Արդարություն և զարգացում» կուսակցության (ԱԶԿ) նիստում պատասխանել է պատգամավորների հարցերին։
Դավութօղլուն ուշադրություն է հրավիրել նրա վրա, որ «զրո խնդիր հարևանների հետ» քաղաքականությունը չի ավարտվել, այն շարունակվում է։ Դավութօղլուն ընդգծել է, որ ներկայիս դրությամբ Թուրքիան խնդիրներ ունի «միայն» Սիրիայի հետ, իսկ իր մյուս հարևան երկրների հետ շատ լավ հարաբերությունների մեջ է։
Սիրիայի հետ կապված՝ Դավութօղլուն ընդգծել է, որ իր երկիրը երբեք չի դաշնակցի այնպիսի երկրի հետ, որը զուլում է կիրառում իր ժողովրդի նկատմամբ. «Ցայժմ ես 61 անգամ այցելել եմ Սիրիա։ Վերջին անգամ ես Սիրիային զգուշացրի վերջ դնել բռնություններին, և պայմանավորվեցինք 14 կետից բաղկացած «ճանապարհային քարտեզի» շուրջ, սակայն դրանք չիրագործվեցին։
Ողջ աշխարհն է ականատես եղել, թե մենք ինչպես ենք արձագանքել, երբ սերբերը Բոսնիայում մզկիթ էին քանդում, երբ Իսրայելը Պաղեստինում մզկիթ էր քանդում։ Այժմ մենք չենք պատրաստվում բացառություն անել մուսուլման երկրի պարագայում և լուռ մնալ, երբ Սիրիայում մզկիթներ են քանդվում»։
Հիշեցնենք, որ ներկայումս Թուրքիան խնդիրներ ունի իր գրեթե բոլոր հարևանների հետ, սակայն դա չի կարող նշանակել «զրո խնդիր հարևանների հետ» քաղաքականության տապալում, քանի որ Թուրքիան գիտակցաբար է գնացել իր հարևանների հետ հարաբերությունների սրմանը՝ նախապես հաշվի առնելով դրանից բխող կորուստներն ու առավելությունները։
Մասնավորապես, Իսրայելի հետ հարաբերությունների վատթարացման շնորհիվ Թուրքիան այսօր վերածվել է արաբական աշխարհի առաջնորդի, «Արաբական գարնան» շնորհիվ Թուրքիայի դիրքերը մեծապես ամրապնդվել են դա վերապրած երկրներում, մասնավորապես՝ Եգիպտոսում և Լիբիայում։
Բացի այդ՝ Իսրայելի հետ հարաբերությունների վատթարացման շնորհիվ Թուրքիան մանևրելու դաշտ է ստացել 2 ոլորտում. Խոսքը, մի կողմից, Իրանի մասին է, որը նրան մեղադրում է սեփական տարածքում իր դեմ ՆԱՏՕ-ի ռադար տեղակայելու և դրանից ստացված տվյալներն Իսրայելին (հնարավոր) փոխանցելու մեջ, իսկ մյուս կողմից՝ դա վերաբերում է Միջերկրական ծովի արևելյան հատվածին, ուր Թուրքիան, պատրվակ բերելով նախորդ տարի Իսրայելի կողմից «Ազատության նավատորմի» վրա գործած հարձակումը (նավերի անպաշտպան լինելը), ինչպես նաև Կիպրոսի կողմից նավթ և գազ արդյունահանելու աշխատանքներ սկսելը, բավական մեծացրել է իր ռազմաքաղաքական ներկայությունը տվյալ տարածաշրջանում։
Ներկայումս Թուրքիան իր հարևանների առումով լուրջ կորուստներ է կրել միայն Սիրիայի պարագայում, որի նախագահ Բաշար Ալ-Ասադը սկսել է այլևս ձեռք չտալ թուրքական կողմին, և Թուրքիայի դիրքերը զգալիորեն սասանվել են այդ երկրում։ Սակայն Սիրիայում իրավիճակը դեռ կարող է շտկվել իշխանափոխության պարագայում։ Դրա համար էլ Դավութօղլուն հայտարարում է, որ Թուրքիան ներկայումս խնդիրներ ունի միայն Սիրիայի հետ։
