Ադրբեջանական Trend լրատվական գործակալությունը, վկայակոչելով ISNA գործակալությանը, հայտնում է, որ Իրանի արտգործնախարար Ալի Աքբար Սալեհին հեռախոսազրույց է ունեցել իր թուրք գործընկեր Ահմեդ Դավութօղլուի հետ։
Հեռախոսազրույցի ժամանակ կողմերը քննարկել են երկկողմանի հարաբերություններին, տարածաշրջանային ու միջազգային խնդիրներին առնչվող հարցեր։ Բացի այդ՝ կողմերը պայմանավորվել են, որ երկկողմանի հարաբերություններին առնչվող այժմեական խնդիրների քննարկումը շարունակելու համար Սալեհին մոտ ժամանակներս այցելելու է Թուրքիա։
Հիշեցնենք, որ այն բանից հետո, ինչ Թուրքիան և ԱՄՆ-ը սեպտեմբերի 14-ին Անկարայում հուշագիր ստորագրեցին Մալաթիայի նահանգի Քյուրեջիք վայրում՝ թուրք-իրանական սահմանից 540 կիլոմետր հեռավորության վրա, ՆԱՏՕ-ի ռադիոտեղորոշիչ կայանի տեղակայման մասին, իրանական կողմը սկսեց ամենատարբեր մակարդակով դրա համար քննադատել Թուրքիային՝ ընդգծելով, որ դա ուղղված է Իրանի և Սիրիայի դեմ՝ ի պաշտպանություն Իսրայելի։
Բացի այդ, Թուրքիան և Իրանը տարբեր մոտեցումներ ունեն Սիրիայի նկատմամբ. իրանական կողմը քանիցս հայտարարել է, որ եթե թուրքական կողմի գործողությունների պատճառով ստիպված լինի ընտրություն կատարել Թուրքիայի և Սիրիայի միջև, ապա անպայմանորեն ընտրելու է արաբական երկրին։
Այս ամենի հետ մեկտեղ, երկու երկրներն ունեն նաև էներգետիկ խնդիր. Իրանը ներկայումս Թուրքիայից պահանջում է 600 միլիոն դոլարի փոխհատուցում, քանի որ Թուրքիան այս տարի պայմանավորվածի համեմատ բավական քիչ գազ է գնել Իրանից, ինչի պատճառն այն է, որ Թուրքիայում ահաբեկչական հռչակված և արգելված Քրդստանի աշխատավորական կուսակցության (PKK) զինյալները քանիցս պայթեցրել են Իրանից Թուրքիա եկող գազատարը, ինչի արդյունքում դադարեցվել է իրանական գազի ներկրումը։