Հայաստանի ոստիկանությունը հերքում է դերասանուհի Անժելա Սարգսյանի գործով կալանավորված Կարեն Արեյանի մոր` Մարինա Արեյանի հայտարարությունը, որում կինը դերասանուհուն մեղադրում է հրեշավոր հանցագործության` մանկապղծության մեջ:
Կալանավորված Արեյանի մայրն ավելի վաղ հայտարարել էր, թե ոստիկանություն է ուղարկել Անժելա Սարգսյանի մասնակցությամբ 1,13 րոպե տևողությամբ տեսանյութ, որտեղ առկա են մանկապղծության կադրեր:
Ինչպես «Առաջին լրատվականի» հետ զրույցում հայտնեցին ոստիկանության մամուլի ծառայությունից, Մարինա Արեյանի կողմից իրենց ուղարկված տեսանյութը փորձաքննության է ենթարկվել, և հերքվել է դրա մեջ պոռնոգրաֆիայի առկայությունը:
Ոստիկանությունից միաժամանակ տեղեկացրեցին, որ դեռևս պարզ չէ` պատասխանատվության կենթարկվի՞ Մարինա Արեյանը իր արած հայտարարության համար, թե ոչ: «Դա կերևա միայն նախաքննության ավարտից հետո»,- նշեցին ոստիկանությունում:
Հիշեցնենք, որ Կարեն Արեյանը ինտերնետում տարածել էր «Ո՞ւր է իմ տղամարդը» սերիալի դերասանուհի Անժելա Սարգսյանի մերկ լուսանկարները: Երիտասարդը ձերբակալվել է հոկտեմբերի 5-ին: Նրան մեղադրանք է առաջադրվել Հայաստանի քրեական օրենսգրքի 144-րդ (անձնական կամ ընտանեկան կյանքի մասին տեղեկություններ ապօրինի հավաքելը, պահելը, օգտագործելը կամ տարածելը) և 263-րդ (պոռնոգրաֆիկ նյութեր կամ առարկաներ ապօրինի տարածելը) հոդվածների հատկանիշներով:
